ЯТЮКІЫРЭ ЩЫНЭРЭШЪХЬ
Паул Тхьэмэтэ Хэсэшхом щыщхэм ахаплъи ариІуагъ:
–Сшыхэр, сэ непэ нэсы Тхьэм ыпашъхьэ гукъэбзагъэкІэ мыхъун зи зыдэсымышІэжьэу сыщыпсэугъ.
2Дин пэщэшхоу Ананый* Паул ыдэжь щытхэм ыжэ еонхэу ариІуагъ. 3Джащыгъум Паул ащ риІуагъ:
–Тхьэр къыоожьыщт. Дэпкъэу фыжьэу къэлъэгъоным пае, агъэлагъэм уфэд. Хабзэм тетэу хьыкум къыстепшІыхьанэу ущыс, ау щытми ор-орэу хабзэм утекІэу къысэогъаоха?
22:25 Рим цІыфхэр –еплъ 16:37.
23:2 Ананый – Хьисэ къызэхъу нэужым я 47-59 илъэсхэм къакІоцІ дин пэщэшхоу щытыгъ.
4Ащ дэжьым щытхэм Паул къыраІуагъ:
–Тхьэм идин пэщэшхом уехъона?
5–Сшыхэр, ар зэрэ дин пэщэшхор сшІэщтыгъэп,– къыІуагъ Паул. –Сыда пІомэ Тхьэм игущыІэ тхыгъэхэм арыт:* «О плъэпкъ итхьаматэ ІэягъэкІэ утегущыІэ хъущтэп».
6Тхьэмэтэ Хэсэшхом щыщхэм ащыщэу зы куп саддукейхэу*, адрэ купыри фарисейхэу* Паул ышІэщтыгъэти, Тхьэмэтэ Хэсэшхом хэтэу къыІуагъ:
–Сшыхэр, сэ сыфарисей, сяти фарисеу щытыгъ. ЛIагъэхэр къызэрэтэджыжьыщтхэм сызэрэщыгугъырэм пае, хьыкумышІэм ыпашъхьэ сыращагъ.
7Арэущтэу къызеІом, фарисейхэмрэ саддукейхэмрэ зэщыхьанхэу аублагъ, лъэныкъуитІоуи зэрэгъэхъугъэх; 8сыда пІомэ саддукейхэм «ЛІагъэхэр къэтэджыжьхэрэп, мэлэІич щыІэп, псэ щыІэп», аІо, ау саддукейхэм афэмыдэхэу фарисейхэм ахэмкІэ зэкІэ шІошъхъуныгъэ яІ.
9Джащыгъум Тхьэмэтэ Хэсэшхом щыщхэр мэкъэшхокІэ къэзэрэгъэкуохи, фарисейхэм ащыщхэу Тэурат егъэджэкІо пэщэ заулэ къэтэджыхи, адрэхэм янэкъокъухэу къаІуагъ:
–Мы лІым мыхъун горэ етлъэгъулІэрэп. Псэ горэ е мэлэІич горэ къыдэгущыІэгъэнкІи мэхъу. Тхьэм тыпэрэмыуцу.
10Лъэшэу зэрэзэщыхьагъэхэм пае, ахэмэ Паул зэпкъыратхъынкІэ дзэ пэщэшхор щыни, Паул ахэмэ къахащынышъ, пытапІэм* ащэнэу дзэлІхэм унашъо афишІыгъ.
11ЯтІонэрэ чэщым Зиусхьаныр Паул къыфэлъагъуи къыриІуагъ:
–Угу умыгъэкІоды! Ерусалим шыхьат укъыщызэрэсфэхъугъэм фэдэу, Рим къэлэшхоми шыхьат укъыщысфэхъун фае.
23:5 Тхьэм игущыІэ тхыгъэхэм арыт – еплъ Пегъымбар Мусэ ятІонэрэ тхылъэу ытхыгъэм 22:28.
23:6 саддукейхэр – еплъ 4:1.
23:6 фарисейхэр – еплъ 5:34.
23:10 пытапІэр – еплъ 21:34.
Паул шъэфэу аукІынэу джуртхэм гухэлъ зэрашІыгъэр
12ЯтІонэрэ мафэм ипчэдыжь джурт заулэ зэгурыІуи, тхьэ аІуагъ:
–Паул тэукІыфэ, тышхэщтэп ыкІи тешъощтэп.
13Тхьэ зыІуагъэхэр нэбгырэ тІокІитІум нахьыбэ хъущтыгъэх. Ахэр дин пэщэшхохэмрэ нахьыжъхэмрэ адэжь кІохи араIуагъ:
14–Паул тэукІыфэ, тымышхэнэу тхьэ тІуагъэ. 15Арышъ, «Паул иІоф нахь тэрэзэу тыхэплъэным пае, тадэжь къащэ», шъуелъэІузэ шъоррэ Тхьэмэтэ Хэсэшхом щыщхэмрэ дзэ пэщэшхом макъэ ежъугъэІу. Паул мыщ дэжьым къэмысызэ, тыукІынэу тыхьазыр.
16Ау Паул ышыпхъу ыкъо ахэмэ ягухэлъ къышІи, пытапІэм кІуи, Паул а къэбарыр ригъэшІагъ.
17Паул дзэ пащэхэм ащыщэу зыгорэм къеджи риІуагъ:
–Дзэ пэщэшхом ыдэжь мы кІалэр щэ. Зыгорэ риІонэу фай.
18Дзэ пащэм кІалэр зыдищи, дзэ пэщэшхом ыдэжь кІуи риІуагъ:
–ТихьапсчІэсэу Паул зыцІэр къысаджи, мы кІалэм зыгорэ къыуиІонэу фаешъ, уадэжь къэсщэнэу къысэлъэІугъ.
19Дзэ пэщэшхом кІалэм ыІэ ыубыти, зы лъэныкъокІэ Іуищи еупчІыгъ:
–КъысэпІонэу сыда узыфаер?
20–«Паул иІоф нахь тэрэзэу тыхэплъэным пае, неущ Тхьэмэтэ Хэсэшхом ыпашъхьэ къащэ», аІоу, джуртхэр къыолъэІунхэу зэгурыІуагъэх,– къыІожьыгъ кІалэм. 21–Ау ахэмэ уямыдэІу; сыда пІомэ ахэмэ ащыщхэу нэбгырэ тІокІитІум нахьыбэ хъухэу, Паул аукІыным пае, шъэфэу пэсых. Ахэмэ ар аукІыфэ, мышхэнхэуи емышъонхэуи тхьэ аІуагъ. Загъэхьазырыгъэу уиунашъо паплъэх ныІэп.
22Дзэ пэщэшхом кІалэр ыгъэкІотэжьызэ къыриІуагъ:
–Мыр къызэрэсэпІуагъэр зыми емыІу!
Паул Іэшъхьэтет Феликс ыдэжь зэращагъэр
23ЕтІанэ дзэ пэщэшхор дзэ пащэхэм ащыщхэу нэбгыритІу ыдэжь къяджи ариІуагъ:
–ДзэлІ нэбгырэ шъитІу, шыухэу нэбгырэ тІокІищырэ пшІырэ, пчыхэр зыІыгъ дзэлІхэу нэбгырэ шъитІу нычэпэ сыхьатыр бгъум Кесарие къалэм* кІонхэу жъугъэхьазырых. 24Шыхэри Паул фэжъугъэхьазырхи, шы горэм тежъугъэтІысхьи, Іэшъхьэтет Феликс* ыдэжь шъущэ.
25Дзэ пэщэшхом мыщ фэдэ гущыІэхэр зэрыт тхылъыри ытхыгъ:
26 «Сэ Клаудый Лисый, о лъытэныгъэшхо зиІэ Іэшъхьэтет Феликс, шІуфэс осэхыжьы.
27 Мы лІыр джуртхэм аубыти, аукІынэу фежьэгъагъэх, ау сидзэлІхэр сигъусэхэу сыкъакІуи, къаІэпысхыжьыгъ, сыда пІомэ рим цІыфхэм зэращыщыр къэсшІагъэти ары. 28 Зэрагъэмысэрэр зэзгъэшІэнэу сыфаеу, я Тхьэмэтэ Хэсэшхо ыпашъхьэ дзэлІхэм къырязгъэщагъ. 29Ахэмэ зэрагъэмысэхэрэр яхабзэ епхыгъэхэ нахь, е укІ е хьапс зифэшъошэ Іоф а лІым зи ымышІагъэу къызэзгъэшІагъ. 30 Ау джуртхэм мы лІыр шъэфэу аукІынэу агу зэрэхэлъыр зыгорэм сигъэшІагъэти, дзэлІхэм уадэжь занкІэу къязгъэщагъ. Къедаохэрэми зэрагъэмысэрэ Іофхэр уапашъхьэ къыщаІонхэу макъэ язгъэІугъ. Отхъэжь!»
31Арэущтэу яунашъо тетэу дзэлІхэм Паул зыдащи, чэщым Антипатридэ къалэм* нагъэсыгъ. 32ДзэлІхэм ятІонэрэ мафэм шыухэм Паул Кесарием ащэнэу къагъанэхи, ежьхэм пытапІэм агъэзэжьыгъ. 33Шыухэр Кесарие къалэм зынэсхэм, Іэшъхьэтетым тхылъыр ратыгъ, Паули ащ фагъэзагъ. 34Іэшъхьэтетыр тхылъым еджи, Паул зыщыщ хэкумкІэ къеучІыгъ. Киликие хэкум щыщэу зызэхехым, къыІуагъ:
23:23 Кесарие къалэр – еплъ 8:40.
23:24 Феликс – Хьисэ къызэхъу нэужым я 52-60 илъэсхэм къакІоцІ Иудей хэкум и Рим (Рум) Іэшъхьэтетэу щытыгъ.
23:31 Антипатридэ къалэр – Ерусалим километрэ 60-кІэ пэчыжьэу, итемыр тыгъэ къохьапІэ лъэныкъомкІэ итыгъ.
35–Къыодаохэрэр къызысхэкІэ, тэрэзэу сыоупчІыщт.
Іэшъхьэтетым етІанэ Ирод пачъыхьэ унэшхоу преторие зыцІэр ыгъэуцугъагъэм дзэлІхэм Паул щаухъумэнэу унашъо ышІыгъ.