ЯТФЭНЭРЭШЪХЬ
Шъузабэхэр, нахьыжъхэр, унэІутхэр
Шыжъым уфэмыгубж, ау тым фэдэу гурыгъаІу; кІалэхэми пшыхэм узэрафыщытым фэдэу афыщыт; 2бзылъфыгъэ нахьыжъхэми ныхэм узэрафыщытым фэдэу афыщыт, бзылъфыгъэ ныбжьыкІэхэми шыпхъухэм узэрафыщытым фэдэу зэкІэ гукъэбзагъэкІэ афыщыт.
3Шъузабэу зизэкъо дэдэхэм лъытэныгъэ афэшІ. 4Зы шъузабэ горэм ибынхэмрэ ибынхэм къакІэхъуагъэхэмрэ иІэхэмэ, ежьхэм яунагъо лъытэныгъэ фашІынэу ыпэ рапшІэу зэрарэгъашІ, ятэ-янэхэмэ къафашІагъэри афарэшІэжь, сыда пІомэ ар Тхьэм игъоу елъытэ. 5Шъузабэу зизэкъо дэдэу къэнагъэр Тхьэм щэгугъы, чэщи мафи Тхьэр къыдэІэпыІэнэу елъэІу зэпыт. 6Ау шъузабэу зызэригъэтхъэжьыным нэмыкІ емыгупшысэрэр, псаоу щыт пэтми, лІагъэм фэд. 7ШІошъхъуныгъэ зиІэхэр зыми зэригъэмысэнхэ зи щымыІэным пае, мы Іоф пстэумкІи унашъо афэшІ. 8Ау цІыфэу зиунэкъощхэм, зэкІэмэ анахьи иунэ исхэм, акІэлъымыплъэрэм ишІошъхъуныгъэ ыгъэпцІыгъ. Ар шІошъхъуныгъэ зимыІэм нахьи нахь дэижь.
9Шъузабэхэм ацІэхэр зэрыт тхылъым шъузабэу зыцІэ ратхэн фаер зыныбжь тІокІищым нэсыгъэу, зэ нахь дэмыкІуагъэу, 10зишІушІагъэхэмкІэ цІыфхэр шыхьат зыфэхъурэр ары: гущыІэм пае, бын зыпІугъэу, хьакІэхэр зыгъэлъэпІагъэу, Тхьэм ицІыф лъапІэхэм* алъакъохэр афэзытхьакІыгъэу, гузэжъогъу хэтхэм адэІэпыІагъэу, шІушІэгъэ пстэуми апылъыгъэ шъузабэр ары.
5:10 Тхьэм ицІыф лъапІэхэр – ИсускІэ шІошъхъуныгъэ зиІэхэр ары.
5:10 алъакъохэр афэзытхьакІыгъэу – а лъэхъанэм хьакІэ горэ унэм къызихьэкІэ, уэІут горэм хьакІэм ылъакъохэр фитхьакІыхэу хабзэу яІагъ.
11Шъузэбэ ныбжьыкІэхэм ацІэхэр а тхылъым имытхэх. Сыда пІомэ хъопсэныгъэ агу къихьэмэ, Христос акІыб къыфагъазэзэ, дэкІожьынхэу фэещтых. 12Арэущтэу гущыІэ пытэу Христос ратыгъэр* зэрамыгъэцэкІагъэм пае, мысэхэу мэхъух. 13Ащ нэмыкІэуи, Іоф амышІэу унэ ихьэ икІэу къакІухьэу яхабз. Іоф зэрамышІэрэм изакъоп, Іоржъорхэу, яІоф зыхэмылъым яІоф халъхьэу, амыІуапхъэхэри аІох. 14Арышъ, шъузэбэ ныбжьыкІэхэр дэкІожьынхэу, быни къакІэхъонэу, яунагъуи зэрахьанэу, джэгъогъоу шэйтаныр ІэягъэкІэ атегущыІэнэу игъо рамыгъэфэнэу сыфай. 15Сыда пІомэ ахэмэ ащыщхэр гъогу занкІэм текІыхи, шэйтаным игъогу техьагъэх.
16ШІошъхъуныгъэ зиІэ бзылъфыгъэ горэм иунэ шъузабэхэр исхэмэ, ар ахэмэ алъыплъэн фае. Чылыс зэІукІэм ахэр хьылъэ фэрэмыхъух, шъузабэу зизэкъо дэдэхэм чылыс зэІукІэр алъыплъэшъуным пае.
17Нахьыжъхэу чылыс зэІукІэр дэгъоу зезыхьэхэрэм лъытэныгъэ нахьыбэ яфэшъуаш, зэкІэмэ апэу Тхьэм игущыІэхэр цІыфхэм языгъэІухэу, языгъашІэхэрэр ары. 18Сыда пІомэ Тхьэм игущыІэ тхыгъэхэм арыт: «Цум лэжьыгъэр ыІо зыхъукІэ, ыжэ зэтемыпх», ыкІи «ЛэжьакІом илэжьапкІэ ыгъотынэу ифэшъуаш». 19ШыхьатитІум, е шыхьатищым къаІорэмкІэ гъэшъыпкъагъэ мыхъумэ, зыгорэм чылыс зэІукІэм инахьыжъхэм ащыщ горэ зэригъэмысэрэр умыдэ. 20ПсэкІод зышІэхэрэм зэкІэмэ апашъхьэ ащыгурыгъаГу, адрэхэр щынэнхэм пае.
21Тхьэм, Зиусхьанэу Исус Христос, Тхьэм къыхихыгъэ мэлэІичхэм апашъхьэ пытэу унашъо къыщыпфэсэшІы, къыпшІошІырэ пхэнджыгъэ Іоф хэмылъэу, зыгорэм ылъэныкъокІи удемыІэу, мы Іоф пстэури гъэцакІэх.
22ЦІыф горэ Зиусхьаным фэлэжьэнэу бгъэнэфэным пае, о пІэхэр ышъхьэ теплъхьанхэу Іофым удэмыгузажъу. НэмыкІ цІыфхэм япсэкІодхэм уиІахьэ ахэлъэу умышІы. Гукъэбзагъэ зигъэІэ зэпыт.
23Псы къодые уемышъу, ау уныбэрэ бэрэ къыпфакІорэ узхэмрэ апае сэнэпс тІэкІу ешъу.
5:12 гущыІэ пытэу Христос ратыгъэр – Христос фэлэжьэнхэм нэмыкІ пымылъынхэу гущыІэ пытэу ратыгъэр ары.
24 ЦІыф заулэмэ япсэкІодшІагъэхэр нэрылъэгъух, а цІыфхэри унэшъо шІыпІэм нэмысхэ рапшІэу мысэу мэхъух. НэмыкІ цІыфхэм япсэкІодшІагъэхэр ауж итхэу, ыужкІэ нэрылъэгъу мэхъух. 25Ащ фэдэу шІушІагъэхэри нафэх. ШІушІагъэхэу нэрылъэгъоу щымытхэри гъэбылъыгъэу къэнэжьышъущтхэп.