ЯПШІЫКІУЗЭНЭРЭШЪХЬ
Исус игъогу рыкІорэ нэбгырэ пшІыкІутІум унашъохэр зафешІыхэ ужым, а чІыпІэм икІи, джуртмэ якъалэхэм цІыфхэм Тхьэм игущыІэхэр щаригъэшІэнхэу ыкІи щаригъэІунхэу кІуагъэ.
УмэхъэкІо* Иуан лІыкІохэр Исус ыдэжь зэригъэкІуагъэхэр
(Лука 7:18-35)
2Иуан хьапсым чІэсэу* Христос Іофэу ышІагъэхэм якъэбар зызэхехым, игъогу рыкІохэрэм ащыщэу нэбгыритІу ыгъакІуи, 3ригъэупчІыгъ:
–Ора къэкІон фаер, хьауми нэмыкІ горэм тыпэплъэн фая?
4–Жъугъэзэжьи,– ариІожьыгъ Исус ахэмэ, –Іофэу зэхэшъухыхэрэмрэ шъулъэгъухэрэмрэ Иуан ешъуІотэжьых: 5Нэшъухэр къэплъэжьых, лъащэхэр тэрэзэу мэзекІожьых, шъоджэ уз Іае зиІэхэр псаохэу, къабзэхэу мэхъужьых, дэгухэм зэхахыжьы, лІагъэхэр къэтэджыжьых, тхьамыкІэхэми къэбарышІур зэхахы. 6Сэщ пае зыгу мыхъун къизымыгъахьэрэр сыхьатмафэ ежьагъ.
7Иуан игъогу рыкІохэрэр зежьэжьхэм, Исус цІыф купышхохэм Иуан ехьылІагъэу ариІоу ыублагъ:
–Шъоф нэкІым шъузыдэкІым, сыда шъулъэгъунэу шъузыфэягъэр? Жьыбгъэм ыгъэсысырэ къамыл шъулъэгъунэу арыгъа? 8Армырмэ, сыда шъулъэгъунэу шъузыфэягъэр ащ дэжьым шъузыдэкІым? Щыгъын дахэхэр зыщыгъ зы лІы горэ арыгъа? Щыгъын дахэхэр зыщыгъхэр зэрысхэр пачъыхьэхэм яунэшхохэр ары. 9Адэ, сыда шъулъэгъунэу шъузыфэягъэр ащ дэжьым шъузыдэкІым? Пегъымбара? Сэ шъосэІо, ар пегъымбар къодыеп, ар пегъэмбарым нахьи нахь ин. 10Ар лІыкІоу Тхьэм игущыІэ тхыгъэхэм* зикъэбар мырэущтэу
11:2 умэхъакІо – еплъ 3:1.
11:2 Иуан хьапсым чІэсэу – еплъ 14:3-4.
11:10 Тхьэм игущыІэ тхыгъэхэм арытыр – еплъ Пегъымбар Малахие тхылъэу ытхыгъэм 3:1.
арытыр ары:
«Мары уапэрапшІэу силІыкІо къэсэгъакІо, ащ уигъогу пфигъэпсыщт».
11–Шъыпкъэр шъосэІо, бзылъфыгъэхэм къакІэхъуагъэхэм ащыщэу умэхъэкІо Иуан нахьи нахь ин щыІэп. Арэу щытми, Тхьэу уашъом щыІэм и Тетыгъошхо ыІэчІэгъ чІэт цІыфхэм ащыщэу анахь цІыкІури Иуан нахьи нахь ин. 12УмэхъэкІо Иуан имафэхэм къащегъэжьагъэу джы нэсы, цІыфхэм Тхьэу уашъом щыІэм и Тетыгъошхо ыІэчІэгъ чІэт цІыфхэм къин арагъэщэчыгъ, бзэджашІэхэми а тетыгъошхор лІыгъэкІэ аубытынэу ыуж итых; 13сыда пІомэ умэхъэкІо Иуан имафэхэм нэсыфэ, пегъымбархэр зэкІэ пегъымбар Мусэ и Тэурат хабзэ итхэмкІи а тетыгъошхор къызэрэкІощтым къытегущыІагъэх. 14Ар шъуштэнэу шъуфаемэ, умэхъэкІо Иуаныр къэкІонэу щытыгъэ пегъымбар Иляс* ары. 15РыдэІонэу тхьакІумэ зиІэм зэхерэх!
16–Джырэ цІыфхэр сыда зыфэзгъэдэщтыр? Урамым тес кІалэхэу мырэущтэу зыІохэу, яныбджэгъумэ яджэхэрэм афэдэх:
17«Къамылым тышъуфепщагъэ пэтми, шъо шъукъэшъуагъэп; тэ гъыбзэ орэд къышъуфэтІуагъэ пэтми, шъо шъугъыгъэп».
18–Сыда пІомэ Иуан къэкІуагъ. Ар мэнэкІы, сэнэпси ешъорэп. «Ащ джынапцІэ хэс», аІо. 19ЦІыф Лъэпкъым Ыкъо къэкІуагъ. Ар машхэ ыкІи ешъо, «Шхэн ешъоныр зикІасэу, хьакъулахь ахъщэр* хэзыххэрэмрэ псэкІод зышІэхэрэмрэ яныбджэгъу», аІо. Ау Тхьэм изэхэшІыкІыныгъэшхо къыхэкІыгъэ хъугъэ-шІагъэхэм азэхэшІыкІыныгъэшхор къагъэшъыпкъэжьы.
Сыхьатмыгъо уежьагъ, Хоразин къалэ! Сыхьатмыгъо уежьагъ, Вифсаидэ къалэ!
(Лука 10:13-15)
20Джащыгъум Исус къалэхэу ежь иІофышхо гъэшІэгъонхэм анахьыбэхэр зыщишІагъэхэм ягыеу ыублагъ,
11:14 къэкІонэу щытыгъэ пегъымбар Иляс – еплъ Пегъымбар Малахие тхылъэу ытхыгъэм 4:5-6.
11:19 хьакъулахь ахъщэр – еплъ 5:46.
ахэр япсэкІодшІагъэхэм зэрафыкІэмыгъожьыгъэхэм пае.
21–Сыхьатмыгъо уежьагъ, Хоразин къалэ! Сыхьатмыгъо уежьагъ, Вифсайдэ къалэ! Сыда пІомэ шъуадэжь сэ щысшІэгъэ Іофышхо гъэшІэгъонхэр къалэхэу Тиррэ Сидонрэ* ащысшІагъэхэу щытыгъэмэ, бэшІагъэу шъыгъоныгъэ щыгъын ащыгъэу.. анэкІухэр яжьэкІэ цІэлагъэхэу япсэкІодшІагъэхэм афыкІэгъожьыщтыгъэх. 22Ау сэ шъосэІо, ахърэт мафэм шъо къинэу шъущэчыщтым нахьи, Тиррэ Сидонрэ къинэу ащэчыщтыр нахь мэкІэщт. 23О Капернаум къалэ, уашъом удэкІоена? Джэхьнэмым икуупІэ нэсыфэ укІоцІырызыщт нахь,* сыда пІомэ уадэжь щысшІэгъэ Іофышхо гъэшІэгъонхэр Содом къалэм* щысшІагъэхэу щытыгъэмэ, ар джы нэсыфэ щытэу къэнэщтыгъ. 24Ау сэ шъосэІо, ахърэт мафэм къинэу о пщэчыщтым нахьи, Содом къинэу ыщэчыщтыр нахь мэкІэщт.
Садэжь шъукъакІуи, гупсэфыныгъэ шъостыщт
(Лука 10:21-22)
25 Ащ дэжьым Исус игущыІэ лъигъэкІуатэу ыІуагъ:
–Сят, уашъоми чІылъэми я Зиусхьан мы Іофхэр цІыф Іушхэмрэ цІыф губзыгъэхэмрэ ашІоушъэфыгъэу, сабыйхэм зэрябгъэшІагъэмкІэ щытхъур пфэсэшІы. 26Ары, Сят, о ар арэущтэу пшІоигъуагъ.
27–Сятэ щыІэ пстэури къысІэкІилъхьагъ. Къо лъапІэр зыфэдэр Ты лъапІэм нэмыкІ зыми ышІэрэп. Ты лъапІэр зыфэдэри Къо лъапІэмрэ Къо лъапІэм ар зэригъэшІэнхэу фэе цІыфхэмрэ анэмыкІ зыми ышІэрэп.
28–ЗэкІэ улэугъэхэу, хьылъэ онтэгъу зытелъхэр, садэжь шъукъакІуи, гупсэфыныгъэ шъостыщт. 29Сэ сибжьы* зытешъулъхьи, сэ къасІорэр зэжъугъашІэ, сыда пІомэ сэ сыгу шъабэ, пэгагъи зи илъэп. ЕтІанэ шъугухэмкІэ гупсэфыныгъэ жъугъотыщт; 30сыда пІомэ сэ сибжьы щэчыгъошІоу, сихьылъи псынкІэу щытышъ ары.
11:21 къалэхэу Тиррэ Сидонрэ – ахэр хымэ къалэхэу Галилей хэкум итемыр лъэныкъокІэ хыІушъом Іутыгъэхэр ары.
11:23 О Капернаум къалэ . . . укІоцІырызыщт нахь – еплъ Пегъымбар Исайас тхылъэу ытхыгъэм 14:13,15.
11:23 Содом къалэр – еплъ 10:15.
11:29 бжьы – цухэр е псыцухэр кум зыкІашІэкІэ, апшъэ тыралъхьэрэ пхъэр ары.