ЯПШІЫКІУБГЪОНЭРЭШЪХЬ
Ащ нэужым Пилат дзэлІхэм Исус аригъэубыти, къамыщкІэ ригъэуагъэх. 2ДзэлІхэм панэм хэшІыкІыгъэу пачъыхьэ тандж абли, Исус ышъхьэ тыралъхьагъ. Плъыжь чІапцІэу зы шъошэ кІыхьи щалъагъ. 3ЕтІанэ къыбгъодахьэхэти аІощтыгъ:
–Опсэу, джуртмэ япачъыхь!
ЕтІанэ енэпэшъоуагъэх.
4Пилат джыри зэ преторием къычІэкІыжьи, джуртмэ ариІуагъ:
–Зэрызгъэмысэн зи зэресымыгъотылІэрэр шъушІэным пае, мары, къышъуфэсэщы.
5Ащ нэуж Исус панэ танджыр ышъхьэ телъэу, шъошэ кІыхьэ плъыжь чІапцІэр щыгъэу къычІэкІыгъ. Пилат цІыфхэм ариІуагъ:
–Мары а цІыфыр.
6Ау дин пэщэшхохэмрэ ухъумакІохэмрэ Исус залъэгъум, къэзэрэгъэкуощтыгъэх:
–Къащым теІулІ! Къащым теІулІ!
–Ар шъо шъущэжьи, къащым тешъуІулІ,– ариІуагъ Пилат, –сыда пІомэ сэ зэрызгъэмысэн зи езгъотылІэрэп.
7–Тэ хабзэ тиІ,*– къыраІожьыгъ джуртхэм. –А хабзэу тиІэм тетэу ар лІэн фае, сыда пІомэ Тхьэм Ыкъоу зишІыгъэшъ ары.
8Пилат а гущыІэхэр зызэхеххэм, лъэшэу къэщтагъ. 9Джыри преторием чІэхьажьи, Исус риІуагъ:
–Тыдэ ущыща?
Исус пэгъокІ зи ритыжьыгъэп.
10–УкъыздэгущыІэрэп, ара?– ыІуи, Пилат Исус риІуагъ. –ПшІэрэба, шъхьафитэу устІупщыжьынэуи, къащым урязгъэІулІынэуи тетыгъо зэрэсиІэр.
11–Ыпшъэ щыІэ Тхьэм къыуимытыгъэмэ, зи къысэпшІэнэу тетыгъо уиІэщтгъэп,– къыриІожьыгъ Исус. –Арэущтэу зэрэщытым пае, о сыкъыпІэкІэзыгъэхьагъэм нахьи нахьыбэу псэкІод иІ.
12Ащ щегъэжьагъэу Исус шъхьафитэу зэритІупщыжьыным Пилат ыуж итыгъ. АрышъхьакІэ джуртхэр къэзэрэгъэкуощтыгъэх:
–Ар шъхьафитэу птІупщыжьмэ, Кайсарым уриныбджэгъоп. Хэтми ежьым пачъыхьэ зызышІыжьырэр Кайсарым ипый.
13Пилат а гущыІэхэр зызэхеххэм, Исус къычІищи, хьыкум тІысыпІэм тетІысхьагъ. А тІысыпІэр зыдэщыІэ чІыпІэм ыцІэ Лифосторотон, джуртыбзэкІи Гаввафэ ары. 14А мафэр Пасхъэ зыцІэ мэфэкІ мэфэшхом ыпэ бэрэскэшхо мэфагъ. Сыхьатыр пшІыкІутІум дэжьыгъ.*
–Мары шъуипачъыхьэ!– ариІуагъ Пилат джуртмэ.
15–Іущ, Іущ, ар къащым теІулІ,– къэзэрэгъэкуощтыгъэх ахэр.
–Шъуипачъыхьэ къащым тесІулІэна?– ариІожьыгъ Пилат.
–Кайсарым нэмыкІ пачъыхьэ тиІэп,– аІожьыгъ дин пэщэшхохэмэ.
16Арэущтэу къызыраІом, Пилат Исус къащым тыраІулІэнэу аІэкІилъхьагъ.
19:7 тэ хабзэ тиІ – еплъ Пегъымбар Мусэ ящэнэрэ тхылъэу ытхыгъэм 24:16.
19:14 сыхьатыр пшІыкІутІум дэжьыгъ – гущыІэ-гущыІэу зэбдзэкІымэ, «яхэнэрэ сыхьатыр» мэхъу. Ащ къикІырэр щэджагъор ары.
Исус къащым зэрэтыраІулІагъэр
(Маттэ 27:32-44; Марк 15:21-32; Лука 23:26-43)
ЕтІанэ Исус зыдащи, ІукІыжьыгъэх. 17Джарэущтэу Исус икъащ ыхьэу, къалэм дэкІи, чІыпІэу «Шъхьапкъ ЧІыпІэ» зыфаІорэм ащагъ. А чІыпІэр джуртыбзэкІэ Голгофэ зыцІэр ары. 18А чІыпІэм Исус къащым щыраІулІыгъ. НэбгыритІу игъусэуи, зыр зы бгъумкІэ адрэр адрэбгъумкІэ, Исус азыфагу дэтэу къащхэм атыраІулІагъэх.
19Пилат пхъэмбгъу горэм «Назарет щыщ Исусэу джуртмэ я Пачъыхьэ» ыІоу, идзэлІхэм тыраригъатхи, къащым тыраригъэгъэуцуагъ. Ар джуртыбзэкІи, урымыбзэкІи*, латинабзэкІи тетхагъэу щытыгъ. 20Исус къащым зыщыраІулІыгъэ чІыпІэр къалэм игъунэгъути, джуртхэм ащыщхэу ащ еджагъэхэр бэу щытыгъэх. 21Ау джуртхэм ядин пэщэшхохэм Пилат къыраІуагъ:
–«Джуртмэ я Пачъыхь» пІоу утемытх, ау Исус «Сэ джуртхэмэ сыря Пачъыхь» ыІуи, зэриІощтыгъэр тетх.
22–Сэ тестхагъар тестхэгъах,– къыІожьыгъ Пилат.
23ДзэлІхэм Исус къащым зыраІулІым, ищыгъынхэр аштэхи, хэтрэ дзэлІым Іахьэ фашІэу, ІэхьиплІэу агощыгъэх. Джанэри аштагъ, арышъхьакІэ джанэр мыдыгъэу, ыпшъэ щегъэжьагъэу ылъапэ нэсы шъагъэу, зы шэкІышхоу щытыгъ.
24–Мыр зэготэшъумыгъэтхъэу, пхъэдз итэжъугъадзи, зытефэрэм еттыщт,– зэраІожьыгъ ахэмэ.
Арэущтэу зыфэхъугъэр мы гущыІэхэу Исус ехьылІагъэу Тхьэм игущыІэ тхыгъэхэм арытхэр* къэшъыпкъэжьынхэр ары:
–Сэ сищыгъынхэр зэфагощыгъэх, сиджанэ пае пхъэдз ашІыгъ.
А гущыІэхэу тхыгъэхэм атетэу дзэлІмэ ашІагъ.
25Исус икъащ ыдэжь яни, янэ ышыпхъуи, Клеопэ зыцІэм ишъхьэгъусэ Мерэми, Магдэлэ къуаджэм щыщ Мерэми щытыгъэх. 26Исус янэрэ игъогу рыкІохэрэм ащыщэу ежьым анахьышІоу ылъэгъурэмрэ ащ дэжьым щытхэу къызелъэгъухэм, янэ къыриІуагъ:
19:19 урымыбзэр – иунаныбзэр ары.
19:24 Тхьэм игущыІэ тхыгъэхэм арытхэр – еплъ Сэбур (Псалтыр) 22:18 (урыс библиемкІэ 21:19).
–О бзылъфыгъ, джы мары о пкъо! 27ЕтІанэ а нэбгырэу игъогу рыкІорэм риІуагъ: –Джы мары уянэ!
А сыхьатым къыщегъэжьагъэу а лІэу Исус игъогу рыкІорэм ежь иунэ Исус янэ щигъэпсэунэу ыщагъ.
Исус зэрэлІагъэр
(Маттэ 27:45-56; Марк 15:33-41; Лука 23:44-49)
28Ащ нэужым иІоф зэриухыгъэр Исус ешІэти, Тхьэм игущыІэ тхыгъэхэм арытхэр къэшъыпкъэжьынхэм пае къыІуагъ:
–ПсыфалІэ сэлІэ.
29Ащ дэжьым сэнэпс шІоІугъэ изэу зы апс горэ щытыгъ. КІышъор зэраІотырэ горэ сэнэпс шІоІугъэм хагъауи, хьисоп зыцІэ къамыл бэщым палъхьи, Исус ыжэ рахьылІагъ. 30Исус сэнэпс шІоІугъэм зыкІэшъу ужым, ыІуагъ:
–СиІоф ухыгъэ.
ЕтІанэ ышъхьэ къыуфи, ыпсэ ытыгъ.
31Бэрэскэшхо мэфагъ. А шэмбэтыр мэфэшхуагъ. Шэмбэт мафэм хьадэхэр къащхэм апамыгъэлъынхэм пае, джуртхэр Пилат елъэІугъэх:
–Унашъо шІы. Къащхэм раІулІыгъэхэм алъэкІапІэхэр зэпарэутхи*, хьадэхэр къащхэм къапарэхыжьых.
32Джарэущтэу дзэлІхэр къакІохи, апэрэм ылъэкІапІэхэр зэпаутыгъэх. ЕтІанэ адрэ нэбгырэу Исус игъусэу адрэ къащым еГулІыгъэм ылъэкІапІэхэр зэпаутыгъэх. 33АрышъхьакІэ, Исус ыдэжь Іухьэхи, зэрэлІагъэр залъэгъум, ащ ылъэкІапІэхэр зэпаутыгъэхэп. 34Ау дзэлІмэ ащыщэу зыгорэ Исус ычапэ пчыкІэ хэпыджагъ. Зэрэхэпыджэу, лъи пси ащ къикІыгъэх. 35Хъугъэр зылъэгъугъэм ар къыушыхьатыгъ, къыушыхьатыгъэри шъыпкъэ. Ар зэрэшъыпкъэр ащ ешІэ. Шъо шІошъхъуныгъэ шъуиІэныр ары ащ къызкІиушыхьатырэр. 36Мы Іофхэр зэкІэ аущтэу
19:31 алъэкІапІэхэр зэпарэутхи – къащхэм раІулІыгъэхэм алъэкІапІэхэр зыфызэпаутыщтыгъэхэр нахь псынкІэу лІэнхэр ары.
19:36 Тхьэм игущыІэ тхыгъэхэм арытхэр – еплъ Пегъымбар Мусэ яплІэ-
зыфэхъугъэхэр мы гущыІэхэу Тхьэм игущыІэ тхыгъэхэм арытхэр* къэшъыпкъэжьынхэр ары:
–Ащ ыкъупшъхьэхэм ащыщэу зи зэпыутыщтэп.
37Ащ нэмыкІэуи Тхьэм игущыІэ тхыгъэхэм мырэущтэу арыт:*
–Зыхэпыджагъэхэм еплъыщтых.
Исус ихьадэ къэунэм зэрэчІалъхьажьыгъэр
(Маттэ 27:57-61; Марк 15:42-47; Лука 23:50-56)
38Юсыф ыцІэу, Аримафей къуаджэм* щыщэу, зы лІы горэ щыІагъ. Ар Исус игъогу рыкІохэрэм шъэфэу ащыщыгъ, сыда пІомэ джуртмэ ащыщынэщтыгъэти ары. Ар Пилат ыдэжь кІуи елъэІугъ:
–Исус ихьадэ къащым къыпысхыжьынэу фит сышІ.
Пилат фит зешІым, Юсыф кІуи, Исус ихьадэ къащым къыпихыжьыгъ.
39Юсыф игъусэу Никодими къэкІуагъ. Никодим ары Исус ыдэжь чэщым къэкІогъагъэр. Ащ литришъэ фэдиз зэхэгъэкІухьагъэу, мэ ІэшІу зыпихырэ уцхэу смирнэрэ алоерэ зыцІэхэр къыздихьыгъэх. 40ЕтІанэ а нэбгыритІумэ Исус ихьадэ къащым къыпахыжьи, джуртмэ хьадэр зэрэчІалъхьажьырэ хабзэм тетэу, мэІэшІу зыпихырэ уцхэр игъусэхэу, чэфынхэр хьадэм ращэкІыгъэх. 41Исус къащым зыщыраІулІыгъэ чІыпІэм хатэ горэ щытыгъ. А хатэм къэунакІэу егъашІэми зы хьадэ зычІамылъхьажьыгъэр дэтыгъ. 42Джуртмэ шэмбэт мафэм пае зызыщагъэхьазырырэ мафэу щытыгъэти, а къэунэри гъунэгъугъэти, Исус ихьадэ ащ чІалъхьажьыгъ.
нэрэ тхылъэу ытхыгъэм 9:12; Сэбур (Псалтыр) 34:20 (урыс библиемкІэ 33:21).
19:37 Тхьэм игущыІэ тхыгъэхэм арыт – еплъ Пегъымбар Зэкъарие тхылъэу ытхыгъэм 12:10.
19:38 Аримафей къуаджэр – Ерусалим километрэ 35-кІэ пэчыжьэу, итемыр тыгъэкъохьэпІэ лъэныкъомкІэ итыгъ.