АПОСТОЛ ПАУЛ ШЮШЪХЪУНЫГЪЭ
ЗИІЭХЭУ РИМ КЪЭЛЭШХОМ ДЭСХЭМ
ТХЫЛЪЭУ АФИТХЫГЪЭР
АПЭРЭШЪХЬ
ШІуфэс ехыныр
Сэ сы Паул, Исус Христос сыфэлажьэ. Христос иапостол* сыхъунэу Тхьэр къысаджи, ежьым ыдэжь къикІырэ къэбарышІур* згъэІунэу сигъэнэфагъ. 2А къэбарышІур ипегъымбархэм ажэкІэ Тхьэм цІыфхэр ыгъэгугъагъэх, игущыІэ тхыгъэ лъапІэхэм* зэрарытым фэдэу. 3А къэбарышІур Ыкъо ехьылІагъ. Ар цІыфэу къэхъугъэу, пачъыхьэ Даутэ къытехъукІыгъэ цІыфхэм ащыщыгъ. 4Исус
1:1 апостол – нэмыкІ цІыф горэм ыцІэкІэ гущыІэнэуи Іоф ышІэнэуи фитыныгъэ зиІэр ары.
1:1 къэбарышІур – Исус Христос ехьылІэгъэ къэбарышІур ары. Тхьэм пегъымбархэм ажэкІэ цІыфхэр къызэригъэгугъэгъэ Іофхэр къыгъэшъыпкъэжьхэзэ ыгъэхъугъэх, арэущтэуи цІыфхэр мыкІодхэу къызэригъэнэжьынхэ гъогу афишІыгъ.
1:2 Тхьэм игущыІэ тхыгъэ лъапІэхэр – мыщ дэжьым ащ къикІырэр джуртхэм ятхылъ лъапІэхэр ары.
лІагъэхэм къызэрахэтэджыкІыжьыгъэмкІэ Тхьэм Ыпсэ ЛъапІэ ар Тхьэм зэри-Къор лъэкІыныгъэкІэ къыгъэнэфагъ. Ежьыр ары Исус Христосэу ти Зиусхьаныр. 5Тхьэм Христос ынэшІу сэ къысщыригъафи, Христос ыцІэкІэ лъэпкъ пстэуми шІошъхъуныгъэ яІэ згъэхъоу, ежьым езгъэдэІунхэм пае, апостолэу сигъэнэфагъ. 6Шъори ахэмэ шъуащыщ, Исус Христос шъори ибынхэм ащыщ шъухъунэу къышъоджагъ.
7Шъо, Рим* къэлэшхом дэсхэу, Тхьэм шІу ылъэгъухэу, ицІыф лъапІэхэм ащыщ хъунхэу къызэджагъэхэм, мы тхылъыр къышъуфэсэтхы.
Тхьэу Тятэ лъапІэмрэ Зиусхьанэу Исус Христосрэ анэшІу къышъущарэфи, гупсэфыныгъэ къышъуарэт.
Паул Рим къэлэшхом кІонэу зэрэфэягъэр
8Ыпэ рапшІэу шъуишІошъхъуныгъэ икъэбар дунаем тыдэкІи цІыфхэм зэрэщагъэІурэм пае, Исус Христос ыцІэкІэ шъо пстэуми пае Тхьэм щытхъу фэсэшІы, 9сыда пІомэ Тхьэу Зыкъо ехьылІэгъэ къэбарышІур згъэІузэ, сыгу етыгъэу сызфэлажьэрэ Тхьэр сишыхьат. Ащ селъэІу зыхъукІэ, сыдигъуи зэпымыоу шъуигугъу зэрэсшІырэмкІэ ар сишыхьат. 10Тхьэм ыІомэ шъуадэжь аужыпкъэм сыкъэкІонэу къыздэхъункІэ селъэІу.
11Сыда пІомэ Тхьэм Ыпсэ ЛъапІэ ыдэжь къикІэу, шъугухэр зыгъэпытэн шІугъэ горэ шъозгъэгъотыным пае, шъуслъэгъунэу инэу сшІоигъу. 12А зы шІошъхъуныгъэу тиІэмкІэ тызэрэгъэгушхоныр ары зыфасІорэр. 13Шъуадэжь сыкъэкІонэу бэрэ сыгу зэрэхэлъыгъэр шъушІэн фае, сшыхэр, ау джы нэсыфэ пэрыохъу горэ къысфэхъущтыгъ. НэмыкІ лъэпкъхэм адэжь шІугъэ къызхэкІырэ Іоф зэрэщысшІагъэм фэдэу, шъуадэжьи Іоф щысшІэнэу сыфай.
14Урымхэми, нэмыкІ лъэпкъхэми, зэхэшІыкІыныгъэ зиІэхэми, зимыІэхэми пшъэрылъ афысиІ. 15Джары шъо Рим къэлэшхом дэсхэм къэбарышІур шъозгъэІунэу инэу зыкІысшІоигъор.
1:7 Рим – Рум ары.
КъэбарышІум лъэкІыныгъэу хэлъыр
16Христос ехьылІэгъэ къэбарышІум сытеукІытыхьэрэп, сыда пІомэ къэбарышІур ары Тхьэм илъэкІыныгъэу хэти шІошъхъуныгъэ зиІэр мыкІодэу къэзыгъэнэжьырэр, апэу джуртыр етІанэ мыджуртыр. 17Сыда пІомэ Тхьэм ежьым ыдэжькІэ цІыфым шъыпкъагъэ иІэу зэрилъытэрэ гъогур къэбарышІум къегъэнафэ. Ыпэ къыщегъэжьагъэу ыкІэ нэс а Іофыр зэрэхъурэр шІошъхъуныгъэм игъогукІэ ары, Тхьэм игущыІэ тхыгъэхэм зэрарытым фэдэу,* «ШІошъхъуныгъэ зэриІэм пае, Тхьэм ыдэжькІэ шъыпкъагъэ зиІэр псэущт».
ЦІыф пстэуми Тхьэм ыдэжькІэ лажьэу яІэр
18Тхьэм ищынагъо цІыфхэм агухэм зэрарымылъым паий, ябзэджагъэ пстэуми апаий игубжэу уашъом къехырэр Тхьэм къегъэнафэ, сыда пІомэ ябзэджагъэкІэ шъыпкъагъэр агъэбылъынэу ыуж итых. 19Тхьэм ехьылІагъэу цІыфмэ ашІэшъущтыр ахэмкІэ нафэ, Тхьэм ар къафигъэнэфагъ. 20Сыда пІомэ Тхьэм дунаер къызигъэхъугъэм щегъэжьагъэу, ежь ищытыкІэу амылъэгъушъурэм Тхьэм къыгъэхъугъэхэмкІэ цІыфхэм нафэу гу лъатэн алъэкІы. ИщытыкІэ амылъэгъушъоу зыфасІорэр илъэкІыныгъэшхоу мыкІодыжьыщтри ары, ежьыр Тхьэу зэрэщытри ары. Арышъ, цІыфхэм зызэрагъэхыен зи щыІэп.
21Тхьэр ашІагъэ пэтми, Тхьэм фэшъуашэу лъытэныгъи щытхъушхуи фашІыгъэп. Ау ягупшысэхэр хьаулыеу хъугъэх, агухэу зэхэшІыкІыныгъэ зимыІэхэри шІункІы хъугъэх. 22ЗэхэшІыкІыныгъэ яІэу зашІошІыжьэу, зэхэшІыкІыныгъэ ямыІэу хъугъэх. 23ЦІыфхэм щытхъушхо зиІэ Тхьэу мыкІодыжьыщтыр амыгъэлъапІэу щытыгъэх. Тхьэм фагъадэхэу, ежьхэм аІэкІэ ашІыгъэ шъо теплъэхэу кІодыжьыщт цІыфхэм, бзыухэм, лъэкъуиплІкІэ зекІохэрэм, ныбэкІэ цуахъохэрэм афэдэхэр тхьэпІалъэу агъэлъэпІагъэх.
24Арышъ, ахэмэ агухэр Іоф мыхъунхэм акІэхъопсхэу, апкъыхэмкІэ мыхъун зэрашІэжьынэу, шІоигъэм хэтхэу Тхьэм къыгъэнагъэх. 25Тхьэм ишъыпкъагъэ ычІыпІэ
1:17 Тхьэм игущыІэ тхыгъэхэм зэрарытым фэдэу – еплъ Пегъымбар Аввакум тхылъэу ытхыгъэм 2:4.
пцІыр рагъэуцуагъ. Тхьэу зэкІэ къэзыгъэхъугъэр амыгъэлъапІэу ыкІи фэмылажьэхэу, Тхьэм къыгъэхъугъэхэр агъэлъэпІагъэх, ахэми афэлэжьагъэх. Ежь Тхьэм мыкІодыжьын щытхъушхор ий. Амин.
26Арышъ, агу зыкІэхъопсырэ Іоф мыхъунхэм апылъынхэу Тхьэм ахэр къыгъэнагъэх. Ябзылъфыгъэхэри зэрэщытын фаем текІыхи, зым адрэм мыхъун ришІэжьыгъ. 27Ащ фэдэу хъулъфыгъэхэри зэрэщытын фаем текІыхи, яшъузхэм якІолІэжьыныр ханэжьи, зы лІыр адрэ лІым кІэхъопс хъугъэ. Арэущтэу хъулъфыгъэхэми мыхъун зэрашІэжьи, апкъыхэмкІэ язекІокІэ емыкІу ифэшъуашэ агъотыжьыгъ.
28Ащ нэмыкІэу Тхьэр ашІэнэу зэрамыдагъэм пае, емыкІу Іофхэр ашІэнхэу акъыл къуанчэр яІэу Тхьэм къыгъэнагъэх. 29Мышъыпкъэгъэ пстэури, зинэ пстэури, тхьагъэпцІыгъэ пстэури, нэйпсыягъэ пстэури, бзэджагъэ пстэури агухэм арызы хъугъэ. Шъугъонри, цІыф укІынри, зэщыхьанри, пцІы усынри, уджэгъунри агухэм арылъ зэпытых. 30Ахэр бзэгухьэх, цІыфхэм ІэягъэкІэ атегущыІэх, Тхьэр ауджэгъу, цІыфхэм агу хагъэкІы, зыщэтхъужьых, загъэпагэ, бзэджагъэхэр къаугупшысых, ятэ-янэхэми афэІорышІэхэрэп. 31ЗэхэшІыкІыныгъэ яІэп, ягущыІэхэр агъэцакІэхэрэп, гуфэбагъи яІэп, зэшІужьыныгъэри гукІэгъуныгъэри зыфэдэхэр ашІэрэп. 32А цІыфхэм Тхьэм иунэшъо зафэр ашІэ, ащ фэдэ Іофхэр зышІэхэрэм укІ зэрафэшъуашэр. Ау щытми, ежьхэм ащ фэдэхэр зэрашІэхэрэм имызакъоу, а Іофхэр зышІэхэрэри адэх.