ЯТФЭНЭРЭШЪХЬ
Тхьэм ежьым ыдэжькІэ шъыпкъагъэ тиІэу тызэрилъытэрэм шІугъэу къыхэкІырэр
Арышъ, шІошъхъуныгъэ зэрэтиІэм пае, Тхьэм ежьым ыдэжькІэ шъыпкъагъэ тиІэу телъытэ. Арэущтэу зэрэщытым пае, ти Зиусхьанэу Исус Христос Тхьэм ыдэжькІэ гупсэфыныгъэ къытитыгъэу щыт. 2Христос ары шІошъхъуныгъэ зэрэтиІэм пае, Тхьэм ынэшІу къытщифэнэу гъогу къытфыІузыхыгъэр. Тхьэм ынэшІу щыфэныгъэр къыднегъэс зэпыт, ежь ищытхъушхомкІи Іахьэ къытлъысыщтым тыщыгугъэу, тызэрэпаплъэрэм пае, тэгушІо. 3Ащ нахьи, гузэжъогъухэу тщэчыхэрэми тащэгушІукІы, сыда пІомэ гузэжъогъу щэчыныгъэм теубытэныгъэр къызэрэхэкІырэр тэшІэ. 4Теубытэныгъэми
4:18 Тхьэм ащ къызэрэриІогъагъэм фэдэ къабзэу – еплъ Пегъымбар Мусэ апэрэ тхылъэу ытхыгъэм 15:5.
Тхьэм ыгу зэІурэ шэнышІур къыхэкІы. ШэнышІуми Тхьэм ІэхьышІур къызэрэтитыщтым тызэрэщыгугъырэр къыхэкІы. 5А щыгугъыныгъэми тыкІигъэгъожьырэп, сыда пІомэ Тхьэм ежь Ыпсэ ЛъапІэу къытитыгъэмкІэ ишІулъэгъуныгъэ инэу тыгухэм къарилъхьагъ.
6Тхьэм ыгъэнэфэгъэ уахътэм ыдэжь тэ тшъхьэкІэ ІэпыІэгъу тызфэмыхъужьышъоу, тэ цІыфхэу Тхьэм ищынагъо зыгу имылъхэм апае Христос лІагъэ. 7Шъыпкъагъэ зиІэ цІыфым ычІыпІэкІэ зыгорэ лІэми, ар бэу хъугъуае. ЦІыфышІум ычІыпІэкІэ зыгорэ лІэнкІи мэхъу. 8Ау шІулъэгъуныгъэу къытфыриІэр Тхьэм мырэущтэу къыгъэлъэгъуагъ: Тэ тыпсэкІодышІэ пэтызэ, Христос тэщ пае лІагъэ.
9Христос къащым лъэу щыкІэкІыгъэм пае, Тхьэм ежьым ыдэжькІэ шъыпкъагъэ тиІэу телъытэ. Арэущтэу зэрэхъугъэм пае, ащ нахьи бэкІэ нахьыбэу Христос Тхьэм игубж тыкъыІэкІихыжьыщт. 10Сыда пІомэ тэ Тхьэм тырипыеу тызыщэтым, ежь Ыкъо илІэныгъэкІэ Тхьэм ежьым тешІужьыгъэу тигъэхъугъ. Джы Тхьэм ежьым тешІужьыгъэу тигъэхъугъэу, Ыкъо ищыІэныгъэмкІэ ащ нахьи нахьыбэу тымыкІодэу тыкъигъэнэжьыщт. 11ТымыкІодэу Тхьэм тыкъызэригъэнэжьыщтым имызакъоу, ти Зиусхьанэу Исус Христос Тхьэм тыщегъэгушІукІы. Христос ары Тхьэм тешІужьыгъэу тызыгъэхъугъэр.
Христосрэ Адэмрэ зэрэзэфэмыдэхэр
12ПсэкІодыр дунаем къытехьанэу зыпкъ къикІыгъэр зы цІыф.* ПсэкІодым игъусэу лІэныгъэри дунаем къытехьагъ. Арэущтэу цІыф пстэуми псэкІод зэрашІагъэм пае, лІэныгъэр зэралъысырэр яІахьэу хъугъэ. 13Сыда пІомэ Тэурат хабзэр къэкІоным ыпэкІэ, псэкІодыр дунаем тетыгъ. Ау хэбзэ унашъохэр щымыІэхэу, Тхьэм цІыфхэм япсэкІодхэр афилъытэхэрэп. 14АрышъхьакІэ Адэм зыцІэм имафэхэм къащегъэжьагъэу пегъымбар Мусэ имафэхэм анэсы, лІэныгъэм цІыфхэм тетыгъо афыриІэу щытыгъ. Ахэмэ псэкІодхэу ашІагъэхэр, Адэм Тхьэм иунашъо зытекІым, псэкІодэу ышІагъэм фэмыдэ-
5:12 зы цІыф – Адэм зыцІэр ары.
щтыгъэхэ пэтми, лІэныгъэм тетыгъо афыриІэу щытыгъ. Ыджы Адэмрэ Христосэу дунаем къэкІонэу щытыгъэмрэ зэфэтэжъугъэгъад.
15Адэм ипсэкІодшІагъэ тынышхоу Тхьэм ынэшІу щыфэныгъэкІэ къытитырэм фэдэп. Сыда пІомэ зы нэбгырэ закъом ипсэкІодшІагъэм къыхэкІыкІэ цІыфыбэ лІагъэ. Ау а псэкІодшІагъэм нахьи, Тхьэм ынэшІу щыфэныгъэ бэкІэ нахь ин, итынышхоу зы нэбгырэу Исус Христос ынэшІу щыфэныгъэкІэ цІыфыбэмэ аритырэри бэкІэ нахь ин. 16Ащ фэдэуи Тхьэм итынышхо къыхэкІырэр а нэбгырэ закъом ипсэкІодшІагъэ къыхэкІыгъэм фэдэп. Сыда пІомэ а нэбгырэ закъом псэкІодэу ышІагъэм къыхэкІыгъэр Тхьэм мысэу зэрилъытагъэр ары. Ау цІыфхэм псэкІодыбэ ашІагъэ пэтми, Тхьэм ежьым ыдэжькІэ ахэмэ шъыпкъагъэ яІэу зэрилъытэхэрэр ары Тхьэм ынэшІу щыфэныгъэкІэ тынышхоу аритырэр. 17Сыда пІомэ зы нэбгырэ закъом ипсэкІодшІагъэ къыхэкІыкІэ лІэныгъэм дунаем ицІыфхэм тетыгъо афыриІэ хъугъэ. Ау ащ нахьи бэкІэ нахьыбэу, нэбгырэ закъоу Исус Христос ышІагъэм пае цІыфхэу Тхьэм ынэшІу инэу зыщифэхэу, уасэ амытэу ежьым ыдэжькІэ шъыпкъагъэ яІэу ылъытэхэрэм щыІэныгъэ агъотынышъ, тетыгъо яІэ хъущт.
18Арышъ, зы псэкІодшІэгъэ закъом къыхэкІыгъэр Тхьэм цІыф пстэури мысэхэу зэрилъытагъэхэр ары. Ащ фэдэу зы нэбгырэ закъом шъыпкъэгъэ Іофэу ышІагъэм къыхэкІырэр Тхьэм цІыф пстэуми щыІэныгъэ аритзэ, ежьым ыдэжькІэ шъыпкъагъэ яІэу зэрилъытэхэрэр ары. 19Сыда пІомэ зы нэбгырэ закъо Тхьэм зэремыдэІугъэм пае, цІыфыбэ псэкІодышІэхэу хъугъэх. Ащ фэдэу зы нэбгырэ закъо Тхьэм зэредэІугъэм паий, Тхьэм ежьым ыдэжькІэ цІыфыбэми шъыпкъагъэ яІэу ылъытэщтых.
20ЕтІанэ Тэурат хабзэр къызэкІом, псэкІодшІагъэхэр нахьыбэ хъугъэх. Ау псэкІодшІагъэхэр нахьыбэ хъу зэхъум, Тхьэм ынэшІу щыфэныгъэри нахь ин хъугъэ. 21Арышъ, псэкІодым цІыфхэм тетыгъо афыриІэу, лІэныгъэр яІахьэу къызэралъигъэсыгъэм фэдэу, Тхьэм ынэшІу щыфэныгъэм цІыфхэм тетыгъо афыриІэу, Исус Христосэу ти Зиусхьан Іофэу ышІагъэм пае, Тхьэм ежьым ыдэжькІэ цІыфхэм шъыпкъагъэ яІэу ылъытэщтых, мыкІодыжьын щыІэныгъи аритыщт.