ЯТФЭНЭРЭШЪХЬ
Паул зинэ зышІэгъэ лІыр зэригъэмысагъэр
Зинэ шІэн зэрэшъухэлъыр цІыфхэм къаІотэжьы: Зыгорэм ятэ ишъуз егъэшъузыжьы. Ащ фэдэ зинэ шІэн хабзэ хымэ лъэпкъхэми ахэлъэп. 2Ау щытми, шъузышІошІыжьы! Арэущтэу шъузышІошІыжьыным ычІыпІэкІэ шъугу къеоу, ар зышІэгъэ лІыр зыхэжъугъэкІын фэягъ. 3Сэ сшъхьэрэ спкъырэкІэ шъуадэжь сыщымыІэ пэтми, сыгурэ спсэрэкІэ шъуадэжь сыщыІ, шъуадэжьи шъыпкъэу сыщыІэм фэдэу, ар зышІагъэр згъэмысэгъахэ. 4Ти Зиусхьанэу Исус ыцІэкІэ шъузэІукІэу, сэри сыгурэ спсэрэкІэ шъуадэжь сыщыІэ зыхъукІэ, ти Зиусхьанэу Исус Христос илъэкІыныгъэкІэ 5а лІыр шэйтаным фэжъугъаз, ыпкъ кІодэу, Зиусхьаныр къызыкІожьыщт мафэм ыдэжь ыпсэ мыкІодэу къэнэжьыным пае.
6Шъузэрэзыщытхъужьырэр дэгъоп. Тэджэпс тІэкІум тхьацур зэкІэ зэригъэшІоІурэр шъошІэба? 7Арышъ, псэкІодым итэджэпсыжъ* зыхэшъух, тхьацукІэ къабзэм фэдэу шъухъуным пае – джыри тхьацу мышІоІу къабзэу шъузэрэщытым фэдэу. Сыда пІомэ Христос къурмэныпхъэ къытфэхъугъ. Ар шъынэу Пасхъэ мэфэкІ мэфэшхохэм* адэжь Тхьэм къурмэныпхъэу фашІыщтыгъэм фэд. 8Арышъ, мэфэкІ мэфэшхор тэжъугъэгъэлъапІэ, ау бзэджагъэмрэ дэигъэмрэ ятэджэпсыжъэу орэмыхъу, ау гукъэбзагъэмрэ шъыпкъагъэмрэ яхьалыгъу мышІоІу къабзэкІэ мэфэкІ мэфэшхор тэжъугъэгъэлъапІэ.
9Зинэ зышІэхэрэм гъусэ шъуафэмыхъунэу къышъуфэстхыгъ. 10Сэ къезгъэубытыгъэр мы дунаем ицІыфхэм ащыщхэу зинэ зышІэхэрэри, нэйпсыехэри, хъункІакІохэри, тхьэ нэпцІхэр зыгъэлъапІэхэрэри арэп. Арэущтэу
5:7 тэджэпсыжъыр – Паул тэджэпсыжъым фигъадэрэр псэкІодэу зезыгъэубгъоу, адрэ цІыфхэм узым фэдэу зэпахырэр ары.
5:7 Пасхъэ зыцІэ мэфэкІ мэфэшхохэр – а мэфэкІ мэфэшхохэр джуртхэм зыкІагъэмэфэкІырэр пщылІыныгъэм къыхищыжьхэзэ, Тхьэм ахэр Мысырым (Египет) къызэрэригъэкІыжьыгъагъэхэр ары. А мэфэкІ мэфэшхохэм апэ тэджэпс зыхэлъ хьалыгъур чІадзыжьы, мэфэшхохэм адэжьи тэджэпс тхьацум халъхьэрэп.
щытыгъэмэ, дунаем шъутекІыжьын фаеу хъущтыгъ. 11Ау къышъуфэстхыгъэр мыры: Зыгорэ шъушыкІэ зэджэжьэу щытми, зинэ ышІэмэ, е нэйпсыеу щытмэ, е тхьэ нэпцІхэр егъэлъапІэхэмэ, е нэмыкІ цІыфхэм ІэягъэкІэ атегущыІэмэ, е ешъуакІоу щытмэ, е хъункІакІоу щытмэ, ащ фэдэ цІыфым гъусэ шъуфэмыхъу. Ащ фэдэ цІыфым ыкІи шъудэмышх.
12Чылыс зэІукІэм щымыщхэм сэ хьыкум атесшІыхьанэу сиІоф хэлъа? Чылыс зэІукІэм щыщхэр арыба, хьыкум зытешъушІыхьан фаер? 13Чылыс зэІукІэм щымыщхэм Тхьэм хьыкум атришІыхьащт. «Арышъ, цІыф бзаджэр зыхэжъугъэкІ».*