ЯБГЪОНЭРЭШЪХЬ
ЦІыфхэм шъыпкъагъэкІэ Тхьэр зэрагъэлъэпІэн фэе
шІыкІэр
Апэрэ зэзэгъыныгъэм тетэу цІыфхэм Тхьэр зэрагъэлъэпІэн фэе шІыкІэм ехьылІэгъэ унашъохэр щыІагъэх. ЦІыфхэм аІэкІэ ашІыгъэу, Тхьэр зыщагъэлъэпІэн чІыпІи
щыІагъ. 2Сыда пІомэ унитІу зиІэ чэтэнгъэІагъэ горэ агъэуцугъ. Апэрэ унэу Унэ КІоцІ ЛъапІэу зыфаІорэм ыкІоцІы остыгъэ тетыпІэр, Іанэр, Тхьэм ыпашъхьэ агъэтІылъыгъэ хьалыгъур щыІагъэх. 3ПэІухъо горэм ыкІыбкІэ Унэ КІоцІэу анахь ЛъапІэу зыфаІорэр щыІагъ. 4МэІэшІу зыпихырэ уцхэм ягъэстыпІэу дышъэм хэшІыкІыгъэмрэ тыдэкІи дышъэ зытебзэгъэ пхъуантэу Тхьэм ежьыррэ цІыфхэмрэ азыфагу дилъхьэгъэ зэзэгъыныгъэм ипхъуантэу зыфаІорэмрэ а унэ кІоцІым итыгъэх. Дышъэм хэшІыкІыгъэ хьакъушыкъоу мэнн зыцІэ шхыныр* зэрылъыр, Хьарун ибэщэу тхьапэхэр къызпыкІагъэр, мыжъобгъуитІоу Тхьэм иунашъохэр зэрытхэр а пхъуантэм дэлъыгъэх. 5А пхъуантэм ышъхьагъкІэ Тхьэм ищытхъушхо къэзыушыхьатырэ Херувим зыфаІорэ мэлэІичхэр щытыгъэх. Ахэмэ атамэхэмкІэ Тхьэм цІыфхэм япсэкІодхэр къызщафигъэгъурэ чІыпІэр къаухъумэщтыгъэх. Ау джы мы Іофхэм зырызэу татегущыІэн тлъэкІыщтэп.
6Мы Іофхэр мырэущтэу гъэпсыгъэхэу, яІоф ашІэнэу дин пащэхэр апэрэ унэ кІоцІым ихьэ зэпытыщтыгъэх. 7Ау ятІонэрэ унэ кІоцІым дин пэщэшхом нэмыкІ зи ихьагъэп, ари илъэсым зэ нахьыбэу ихьэщтыгъэп. Ащ дэжьым къурмэныпхъэм ыл зыдимыхьэу ихьэщтыгъэп. А къурмэныр ежьым ипсэкІодхэр ыпщыныжьынхэм паий, цІыфмэ амышІахэу ашІэгъэ псэкІодхэр ыпщыныжьынхэм паий ышІыгъ. 8Тхьэм Ыпсэ ЛъапІэ а гъэпсыкІэмкІэ къегъэнафэ, Унэу КІоцІэу анахь ЛъапІэу уашъом щыІэм ыдэжь кІорэ гъогур зэрэІумыхыгъэр, а чэтэнгъэІэгъэжъыр щэтыфэ. 9А Іоф пстэуми джырэ лъэхъанэм Іофыр зытетыр къагъэлъагъо: цІыфхэм тынхэу Тхьэм фахьыхэрэмрэ къурмэнхэу фашІыхэрэмрэ агухэм якъэбзагъэ икъугъэу агъэхъун алъэкІырэп. 10А тынхэри а къурмэнхэри зэпхыгъэ Іоф закъохэр шхэнми ешъонми яІофрэ, диным ехьылІагъэу зэфэмыдэ шІыкІэхэу цІыфхэм зызэрагъэкъэбзэжьынхэм яІофрэ ары. Ахэр цІыфхэм апкъ епхыгъэ унашъох; Тхьэм Іофхэр зэкІэ зэблехъужьыфэ, а унашъохэр щыІэнхэ фэягъэ ныІэп.
9:4 мэнн зыцІэ шхыныр – Израил цІыфхэр Мысырым (Египет) къикІыжьхи, шъоф нэкІым къыщакІухьэу зыщэтым, шхынэу Тхьэм аригъэшхыгъэр ары. Еплъ Пегъымбар Мусэ ятІонэрэ тхылъэу ытхыгъэм 16:4-5.
11Ау Христос джы щыІэ ІофышІухэр къыздихьыхэзэ, дин пэщэшхоу къэкІуагъ. Мы дунаем тет чэтэнгъэІагъэм нахьи нахь чэтэнгъэІэгъэшхоу ыкІи чэтэнгъэІагъэ нахь икъугъэу щытым ыкІоцІ дин пэщэшхоу Іоф щешІэ. А чэтэнгъэІагъэр цІыфхэм аІэкІэ ашІыгъэ чэтэнгъэагъэу щытэп, ащ къикІырэр а чэтэнгъэІагъэр мы дунаеу Тхьэм къыгъэхъугъэм щыщэп. 12Пчэнымрэ танэмрэ якъурмэныпхъэ лъыр зыдимыхьэу, ежьым ылъэу къащым щыкІэкІыгъэу, Унэу КІоцІэу анахь ЛъапІэу уашъом щыІэм Христос, джыри зэ имыхьажьынэу, зэ закъоу ихьагъ. Арэущтэу ежьым ылъкІэ мыкІодыжьын шъхьафитныгъэ тигъэгъотызэ, тэ тшъхьэхэр ыщэфыжьыгъэх. 13Дин пащэхэм пчэнхэмрэ шкІэхэмрэ якъурмэныпхъэ лъырэ чэмым ияжьэрэ цІыфхэу Тхьэм ыдэжькІэ мыкъабзэхэу щытхэм атыраутхэщтыгъэх, ахэр къабзэхэу хъужьынхэм пае. 14Ащ нахьи нахьыбэу лІэныгъэр къызхэкІырэ Іофхэм тапыкІыжьынэуи, щыІэныгъэрэ шъыпкъагъэрэ зиІэ Тхьэм тыфэлэжьэнэуи Христос ылъ тыгухэр егъэкъэбзэжьых. Христос щыкІагъэ зи зимыІэ къурмэныпхъэ икъугъэу щытым фэдэу, Тхьэм Ыпсэ ЛъапІэу сыдигъуи щыІэм илъэкІыныгъэкІэ Тхьэм зыритыгъ.
15Джащ паий, Христосыр ары Тхьэмрэ цІыфхэмрэ азыфагу зэзэгъыныгъакІэр дэлъэу зыгъэхъурэр, Тхьэр зибынхэм ащыщ хъунхэу къызэджэгъэ цІыфхэм мыкІодыжьынэу щыт ІэхьышІоу къызэригъэгугъагъэхэр къалъысынхэм пае. Сыда пІомэ цІыфхэу апэрэ зэзэгъыныгъэм ыІэчІэгъ чІэтхэу, псэкІод зышІагъэхэм ашъхьэхэр Христос илІэныгъэкІэ ыщэфыжьыгъэх.
16Осыет щыІэмэ, осыетыр къэзышІыгъэр зэрэлІагъэр къагъэшъыпкъэжьын фае, 17сыда пІомэ осыетыр зыбгъэцакІэ хъущтыр, ар къэзышІыгъэр зылІэрэ ыужыр ары ныІэп. КъэзышІыгъэр псаумэ, осыетыр бгъэцакІэ хъущтэп. 18Ащ паий, апэрэ зэзэгъыныгъэри бгъэцакІэ хъун зэзэгъыныгъэу зыгъэхъугъэ закъор лъыр ары. 19Сыда пІомэ, пегъымбар Мусэ Тэурат хабзэм иунашъохэр зэкІэ цІыф пстэуми зарегъэІум ыуж, цы плъыжь чІапцІэр иссоп зыцІэ куандэм икъутамэхэм апишІи, танэхэмрэ пчэнхэмрэ алъ псы игъусэу ышти, а къутамэхэмкІэ тхылъымрэ цІыф пстэумрэ атриутхагъ. 20Мусэ етІанэ
къыІуагъ:* «Мы лъыр ары зэзэгъыныгъэу Тхьэм унашъо къызэрэшъуфишІыгъэм фэдэу шъузэредэІун фаер къэзыгъэшъыпкъэжьырэр». 21Ащ фэдэуи чэтэнгъэІагъэмрэ Тхьэр зэрагъэлъапІэрэ псэуалъэ пстэумрэ лъы атриутхагъ. 22Шъыпкъэ, Тэурат хабзэм зэритым фэдэу, сыд щыщри къэнагъэ шІагъо щымыІэу, лъыкІэ агъэкъэбзэжьы, къурмэнылъи хэмылъэу псэкІод гъэгъуныгъэ щыІэп.
Христос къурмэныпхъэу зишІызэ, цІыфхэм япсэкІодхэр зэратрихыжьрэр
23Арэущтэу а Іофхэу сызтегущыІагъэхэу, уашъом щыІэ Іоф шъыпкъэхэм ашъо теплъэхэу щытхэр мы къурмэнхэмкІэ агъэкъэбзэжьын фэягъэ. Ау уашъом щыІэ Іофхэм а къурмэнхэм анахьи нахь къурмэнышІухэр яфэшъуашэх. 24Сыда пІомэ цІыфмэ ашІыгъэ чэтэнгъэІагъэу Тхьэр зыдэщыІэ чІыпІэ шъыпкъэм ышъо теплъэу щытыр арэп Христос зэрыхьагъэр, уашъоу Тхьэр зыдэщыІэ чІыпІэ дэдэр ары зэрыхьагъэр, джы тэщ пае Тхьэм ыпашъхьэ ихьанэу. 25Дин пэщэшхор Унэ КІоцІэу анахь ЛъапІэу зыфаІорэм илъэс къэс ежьым ылъ мыхъоу, къурмэныпхъэм ылъ зыдихьэу ихьащтыгъ. Ау Христос уашъоу Тхьэр зыдэщыІэ чІыпІэм зыфихьагъэр бэрэ къурмэныпхъэу зишІыныр арэп, джыри зэ къурмэныпхъэ зимышІыжьынэу, зэ закъо къурмэныпхъэу зишІыныр ары нахь. 26Арэущтэу щымытыгъэмэ, Тхьэм дунаер къызигъэхъугъэм щегъэжьагъэу Христос бэрэ ыщэчын фаеу хъущтыгъ. Ау ежьым къурмэныпхъэу зызэришІыгъэмкІэ псэкІодыр ыгъэкІодынэу джы лъэхъанэхэм якІэух дэжь, джыри зэ къэмылъэгъожьынэу, зэ закъо къэлъэгъуагъ. 27ЦІыф пстэури зэ лІэжьын фаех, етІанэ Тхьэм хьыкум атришІыхьащт. 28Ащ фэдэуи цІыфыбэмэ япсэкІодхэр атрихыжьынхэу Христоси зэ закъо къурмэныпхъэу зишІыгъ. ЕтІани зэ къэлъэгъожьыщт.* КъызылъэгъожькІэ, цІыфхэм япсэкІодхэр атрихыжьынхэу арэп къызфэкІощтыр, цІыфхэу ежьыр къызэрэкІожьыщтым щыгугъыхэу, паплъэхэрэр мыкІодхэу къыгъэнэжьынхэу ары нахь.
9:20 Мусэ етІанэ къыІуагъ – еплъ Пегъымбар Мусэ ятІонэрэ тхылъэу ытхыгъэм 24:8.
9:28 ЕтІани зэ къэлъэгъожьыщт – дунаем икІэух ыдэжь ары къызылъэгъожьыщтыр.