ЯПШІЫКІУТФЭНЭРЭШЪХЬ
Мэлэу кІодыгъэм ехьылІэгъэ гъэсэпэ тхыдэр
(Маттэ 18:12-14)
Хьакъулахь ахъщэр хэзыххэрэмрэ псэкІод зышІэхэрэмрэ зэкІэ Хьисэ едэІунхэу къекІолІагъэх. 2 Ау фарисейхэмрэ Тэурат егъэджэкІо пащэхэмрэ агу емыІоу аІуагъ:
–Мы лІым псэкІод зышІэрэ цІыфхэр гъусэ зыфешІых ыкІи адэшхэ.
3Арэущтэу къызаІом, Хьисэ мы гъэсэпэ тхыдэр ахэмэ афиІотагъ:
4– Шъуащыщэу зыгорэм мэлишъэ иІэу тІон. Ахэмэ ащыщэу зыр шІокІодмэ, адрэ тІокІиплІырэ пшІыкІубгъурэр губгъом къыринэнхэшъ, кІодыгъэр къегъотыжьыфэ лъыхъонба? 5Ар къызигъотыжькІэ, гушІоу къеІэтышъ, ытамэ къытырелъхьэ. 6Унэм къызыкІожькІэ, иныбджэгъухэмрэ игъунэгъухэмрэ къяджэшъ, ареІо: «ШъукъыздэгушІу, сэ симэлэу сшІокІодыгъэр къэзгъотыжьыгъ». 7Сэ шъосэІо, ащ фэдэу шъыпкъагъэ зиІэ нэбгырэ тІокІиплІырэ пшІыкІубгъурэу псэкІод фыкІэгъожьыныр зимыщыкІагъэхэм апае, гушІуагъоу уашъом щыхъурэм нахьи, псэкІод зышІэрэ цІыф закъоу зипсэкІодхэм афыкІэгъожьырэм пае, уашъом нахь гушІогъошхо щыхъущт.
Тыжьын ахъщэу кІодыгъэм ехьылІэгъэ гъэсэпэ тхыдэр
8– Ащ фэдэуи бзылъфыгъэ горэм тыжьын ахъщипшІ иІэу тІон. Ахэмэ ащыщэу зыр шІокІодмэ, остыгъэ хигъанэу, ахъщэр къегъотыжьыфэ, фэсакъыпэу лъыхъузэ, унэр зэкІэ къыпхъэнкІынба? 9Ар къызигъотыжькІэ, иныбджэгъухэмрэ игъунэгъухэмрэ къяджэшъ, ареІо: «ШъукъыздэгушІу, ахъщэу сшІокІодыгъэр къэзгъотыжьыгъ». 10 Сэ шъосэІо, ащ фэдэ къабзэу псэкІод зышІэрэ цІыфэу кІэгъожьырэм Тхьэм имэлэІичхэр фэгушІощтых.
КІодыгъэ кІалэм ехьылІэгъэ гъэсэпэ тхыдэр
11 –Зы лІы горэм къуитІу иІагъ,– къыІуагъ Хьисэ. 12 –Къо нахьыкІэм ятэ риІуагъ: «Сят, мылъкум щыщэу къыстефэщт Іахьэр къысэт». Арыти, тым мылъкур ахэмэ афигощыгъ.
13–Мэфэ заулэ зытешІэм, къо нахьыкІэм иІэр зэкІэ зэкІиугъуаий, хымэ хэгъэгу горэм кІуагъэ. А хэгъэгум мыхъо-мышІэ псэукІэкІэ имылъку щигъэкІодыгъ. 14ЗэкІэри зегъэкІодым, гъэблэшхо а хэгъэгум къыщыхъуи, щыкІэгъэшхо иІэ хъугъэ. 15Арэущтэу зэхъум, а хэгъэгум щыпсэурэ лІы горэм ыдэжь кІуи, Іоф къыІихыгъ. А лІым икъохэр губгъом щигъэхъунхэу ыгъэкІуагъ. 16Къохэм яІус щыщ ыныбэ из ышІынэу ехъуапсэщтыгъ, ау а Іусым щыщ хэти ащ къыритыгъэп.
17–КІалэм итхьамыкІагъо зыздешІэжьым, ышъхьэ фиІожьыгъ: «Сэ сятэ илэжьакІохэр сыд фэдиз хъухэми, шхын афырикъуни къялыжьыни яІ, ау сэ мэлакІэм сиукІэу мыщ дэжьым сыщыІ! 18Сятэ ыдэжь сыкІожьынышъ, есІощт: Сят, уашъомкІи оркІи псэкІод сшІагъэ. 190 сэ скъо къысэпІонэу сифэшъуашэп. О уилэжьакІохэм ащыщэу зым фэдэу сэри сышт». 20ЕтІанэ тэджи, ятэ ыдэжь кІожьынэу ежьагъ.
–Ыкъо чыжьэкІэ къэкІожьэу ятэ къызелъэгъум, ыгу егъуи, пэгъочъи, ІаплІ рищэкІи, ебэоу ыублагъ.
21 – Ыкъо ятэ риІуагъ: «Сят, уашъомкІи оркІи псэкІод сшІагъэ. О сэ скъо къысэпІонэу сифэшъуашэп».
22–Ау ятэ иунэІутхэм ариІуагъ: «Щыгъынхэм анахь дэгъур псынкІэу къыфэшъухьи щышъулъ. Зы Іэлъыни Іэрышъулъхь, цуакъэхэри щышъулъэх. 23Тэнэ гъэшхагъэр къашъущи, шІошъубз. Тыжъугъашх ыкІи тыжъугъэгушІу. 24Мы сэ скъо лІагъэу щытыгъ, ау къэхъужьыгъ, кІодыгъэу щытыгъ, ау къэдгъотыжьыгъ». Арэущтэу ешхэ-ешъошхо ашІэу аублагъ.
25 –Ау тым ыкъо нахьыжъ губгъом итыгъ. КъэкІожьэу унэм игъунэгъу къызэхъум, орэд макъэрэ Іэгу тео макъэрэ зэхихыгъ. 26УнэІутхэм ащыщэу зыгорэм еджи, «Сыда къэхъугъэр?» ыІуи еупчІыгъ. 27УнэІутым къыриІуагъ: «ПшынахьыкІэ къэкІожьыгъ. Уятэ ар псаоу зэригъотыжьыгъэм пае, тэнэ гъэшхагъэр шІуаригъэбзыгъ».
28–Къо нахьыжъым ар зызэхехым, къэгубжи, унэм ихьажьынэу фэягъэп. Ау ятэ унэм къикІи, ихьажьынэу къелъэІоу ыублагъ. 29Къо нахьыжъым ятэ пэгъокІ ритыгъ: «КъэдаІу! Сэ мыщ фэдиз илъэс хъугъэу сыпфэлажьэ, о уиунашъохэми зыкІи сатекІыгъэп. Сэ синыбджэгъухэми ешхэ-ешъошхо афэсшІыным пае, зы чэцІи къысэптыгъэп. 30Ау джы о пкъо зыфапІоу уимылъку бзылъфыгъэ хэтакІохэм атезыгъэкІодагъэр къэкІожьыгъэшъ, тэнэ гъэшхагъэр фышІуябгъэбзыгъ!»
31 –Ау тым къыриІуагъ: «Скъо, о сыдигъуи садэжь ущыІ, сиІэ пстэури оуий. 32Ау тэ тыгушІон ыкІи тытхъэжьын фаеба, мы пшынахьыкІэ лІагъэу щытыгъ, ау къэхъужьыгъ, кІодыгъэу щытыгъ, ау къэдгъотыжьыгъ»?