ЯПЛІЭНЭРЭШЪХЬ
Мы дунаем ныбджэгъу уфэхъуныр
Зэпыиныгъэрэ зэщыхьаныгъэрэ тыдэ къикІыхэу къышъухахьэхэра? Хъопсэныгъэ Іаехэу шъугухэм ащызаохэрэр арыба къызхэкІыхэрэр? 2Зыгорэм шъуфай, ау къыжъудэхъурэп. ШъоукІы ыкІи шъохъуапсэ, ау шъузыфаер шъуІэкІахьэрэп. Шъузэщэхьэх ыкІи шъузэпый. Тхьэм къышъуитынэу шъуелъэІурэпышъ, зи шъуиІэп. 3Тхьэм шъуелъэІуми, зи къышъуитырэп, сыда пІомэ Іэягъэ шъугу-
3:12 ыджыр чъыгыр – «смоковницэ» ары. 3:12 зейтун – «маслинэ» ары.
хэм арылъэу, шъугухэр зыкІэхъопсырэ Іофхэм атежъугъэкІодыныр ары Тхьэм шъузфелъэІурэр.
4Шъо зинэ зышІэхэрэм шъуафэд. Мы дунаем ныбджэгъу шъуфэхъуным Тхьэм пый шъуфэхъуныр ары къикІырэр, шъошІэба ар? Арэущтэу хэти дунаем ныбджэгъу фэхъунэу фаер Тхьэм пый фэхъу. 5Хьауми Тхьэм игущыІэ тхыгъэхэм мырэущтэу зэрарытыр хьаулыеу шъогугъа: «Тыгухэм арылъ псэр лъэшэу мэшъугъо?» 6Ау тыгухэм арылъым нахьи, Тхьэм ынэшІу щыфэныгъэ нахь ин. Арышъ, Тхьэм игущыІэ тхыгъэхэм мырэущтэу арыт:*
«Тхьэр пэгагъэ зыгу илъ цІыфым пэуцужьы, ау пэгагъэ зыгу имылъым ынэшІу къыщефэ».
7Арышъ, Тхьэм шъуфэІорышІ. Шэйтаным шъупэуцуи, шъуапашъхьэ икІынышъ, кІитхъужьыщт. 8Тхьэм пэгъунэгъу шъухъуи, ежьыри къышъупэгъунэгъу хъущт. ШъуІэхэр жъугъэкъабзэх, шъо псэкІод зышІэхэрэм, шъугухэр жъугъэкъабзэх, шъо теубытэныгъэ зимыІэхэу, акъыл тІуанэхэр зиІэхэм. 9Шъунэшхъэй, шъугъ, ыкІи шъупыхь. Шъуидэхьашхын гъынкІэ, шъуигушІуагъуи нэшхъэигъэкІэ зэблэхъугъэу орэхъу. 10Тхьэм ыпашъхьэ зыщыжъугъэцІыкІуи, ежьыми шъукъиІэтыщт.
Тшы горэм хьыкум тепшІыхьаныр
11Сшыхэр, ІэягъэкІэ шъузэтемыгущыІэжь. ЦІыфэу зыш ІэягъэкІэ тегущыІэу зыгъэмысэрэр Тхьэм иунашъохэм ІэягъэкІэ атегущыІэ, ахэри егъэмысэх. Ау Тхьэм иунашъохэр бгъэмысэхэмэ, ахэр умыгъэцэкІагъэхэу мэхъу, хьыкум атепшІыхьагъэуи мэхъу. 12ЦІыфхэм унашъохэр афэзышІэу, хьыкум атезышІыхьэрэр зы закъоу мэхъу, цІыфхэр мыкІодхэу къэзыгъэнэжьынэу ыкІи зыгъэкІодынэу лъэкІыныгъэ ЗиІэр ары. Ау о хэт ущыщ, уигъунэгъу бгъэмысэжьынэу?
4:6 Тхьэм игущыІэ тхыгъэхэм арыт – еплъ ГущыІэжъхэу пачъыхьэ Сэлмэн ытхыгъэхэм (Притчи) 3:34.
Узщымытхъужь
13Джы шъукъэдаІу, шъо, мырэущтэу зыІохэрэр: «Непэ е неущ мо къалэм е адрэ къалэм тыкІонышъ, зы илъэс тыкъэтыщт, щэф-щэжьынымкІэ ахъщэ къэдгъэхъэщт». 14Ау неущ хъущтыр шъушІэрэп. ШъуищыІэныгъэ сыд фэда? Зы тІэкІурэ къэлъагъоу, етІанэ кІодыжьырэ пахъэм шъуфэд. 15Ау арэущтэу шъумыІоу мырэущтэу шъуІон фае: «Зиусхьаныр фаемэ, тыпсэущт, мыхэр е мохэр тшІэщтых». 16Ау джы зышъошІошІыжьы ыкІи шъузыщэтхъужьы. Ащ фэдэ зыщытхъужьыныр зэкІэ дэи. 17Арышъ, шІугъэу ыгъэцэкІэн фаер гурыІо пэтми, зымыгъэцакІэрэм псэкІод ешІэ.