ЯТЮНЭРЭШЪХЬ
Тхьэм цІыфхэм хьыкум зэратришІыхьэрэр зафэ
О хэт ущыщми, нэмыкІ зыгорэ бгъэмысэмэ, зызэрыбгъэхыижьын зи щыІэп. Ар зэрэбгъэмысэрэмкІэ о зыогъэмысэжьы, сыда пІомэ адрэр зэрыбгъэмысэрэ Іофхэр ори ошІэх. 2Ащ фэдэ Іофхэр зышІэхэрэм Тхьэм шъыпкъагъэм тетэу хьыкум зэратришІыхьащтыр тэшІэ. 3Ау а Іофхэр зышІэхэрэр о бгъэмысэхэу щыт пэтми, ори ахэмэ ашІагъэм фэдэу пшІэу, Тхьэм ихьыкум къыптримышІыхьанэу огугъа? 4Хьауми Тхьэм ишІугъэшхо, игу-
шъэбэгъэшхо, ищыІэгъэшхо зэмыпэсхэу ара? Тхьэм ишІугъэшхокІэ уипсэкІодхэм уафыкІэгъожьынэу игъо къызэрэпфигъафэрэр къыбгурыІорэба?
5Ау уигуркъагъэкІи, угукІэ уипсэкІодхэм узэрафыкІэмыгъожьырэмкІи мафэу Тхьэм игубжырэ ихьыкум зафэрэ къызылъэгъощтым дэжь Тхьэм губжэу къыптырилъхьащтым хэогъахъо. 6Тхьэм хэти Іофхэу ышІагъэхэмяфэшъуашэ ригъэгъотыжьыщт. 7ШІушІэным ыуж имыкІхэу, щытхъушхом, лъытэныгъэшхом, мылІэныгъэм ауж итхэм мыкІодыжьын щыІэныгъэ аритыщт. 8Ау цІыфхэу зызыгъэкъаигъэхэу, шъыпкъагъэм фэмыІорышІэхэу, бзэджагъэм зезытхэрэм Тхьэм игубжышхо къалъигъэсыщт. 9Тхьэм хэти бзэджагъэ зышІэрэм гузэжъогъурэ гухэкІыгъорэ къылъигъэсыщт, апэу джуртым етІанэ мыджуртым. 10Ау Тхьэм хэтэуи шІу зышІэрэм щытхъу, лъытэныгъэ, гупсэфыныгъэ къылъигъэсыщт, апэу джуртым етІанэ мыджуртым. 11Сыда пІомэ Тхьэр цІыфхэм ятеплъэ емыплъэу, цІыф пстэури изэфэдэхэу щытых.
12Пегъымбар Мусэ и Тэурат хабзэ зимыІэхэу, псэкІод зышІэгъэ цІыф пстэуми Тэурат хабзэр ямыІагъэ пэтми, кІодыжьыщтых. Тэурат хабзэм ыІэчІэгъ чІэтхэу, псэкІод зышІэгъэ цІыф пстэури Тэурат хабзэм тетэу Тхьэм ыгъэмысэщтых. 13Сыда пІомэ Тэурат хабзэм итхэр зэхэзыххэрэр арэп Тхьэм ыдэжькІэ шъыпкъагъэ зиІэхэр, Тэурат хабзэм итхэр зыгъэцакІэхэрэр ары нахь. 14Хымэ лъэпкъхэм* ащыщхэу Тэурат хабзэр зимыІэхэм гурыІоныгъэу ахэлъымкІэ Тэурат хабзэм итхэр загъэцакІэхэкІэ, Тэурат хабзэр ямыІэ пэтми, хабзэр зыфэдэр зэрашІэрэр къагъэлъагъо, 15сыда пІомэ Тэурат хабзэм иунашъохэр агухэм арытхагъэхэу зэрарылъхэр а цІыфхэм къагъэлъагъо. Арэущтэу зэрэщытыр агухэми къаушыхьаты, а цІыфхэм ягупшысэхэмкІи зэ загъэмысэ, зэ загъэхые. 16А Іофыр арэущтэу зэрэщытыр нафэ хъущт, къэбарышІоу згъэІурэм тетэу, цІыфхэм агухэм арылъ шъэфхэм Тхьэм Исус Христос хьыкум зыщатрыригъэшІыхьащт мафэм дэжь.
Джуртхэмрэ Тэурат хабзэмрэ
17 «Сэ сыджурт», оІо. Тэурат хабзэм ущэгугъы ыкІи «Тхьэр сэшІэ», пІозэ узщэтхъужьы. 18Тэурат хабзэм итхэр
2:14 хымэ лъэпкъхэр – мыджуртхэр ары.
зэрэуагъэшІагъэм пае, Тхьэр зыфаер ошІэ, дэгъур зыфэдэри зэхэпшІыкІын плъэкІыщт. 19ШІэныгъэ пстэури шъыпкъагъэ пстэури зэрыт Тэурат хабзэр о пІэ илъэу, нэщъухэм уряпэрытэу, шІункІыгъэм хэтхэми урянэфынэу узщэгугъыжьы. 20ІПІэныгъэ зимыІэхэм агурызыгъэІощтыр орэу, ныбжьыкІэхэми Іофхэр языгъэшІэщтыр орэу узщэгугъыжьы. 21НэмыкІрэ цІыфым Іофхэр еогъашІэх, о пшъхьэ еогъашІа? 22ЦІыфхэр мытыгъонхэу яоІо, о пшъхьэкІэ отыгъуа? «Зинэ умышІэ», цІыфхэм яоІо, о пшъхьэкІэ зинэ ошІа? Тхьэ нэпцІхэм ашъо теплъэхэр зэппэсхэрэп, тхьэ нэпцІхэм ашъо теплъэхэр зэрыт унэхэр о пшъхьэкІэ охъункІэха? 23Тэурат хабзэр зэрэуиІэм пае узщэтхъужьы, ау Тэурат хабзэм итхэм узэратекІырэмкІэ Тхьэр огъэпыута? 24Тхьэм игущыІэ тхыгъэхэм зэрарытым фэдэу,* «Шъощ пае хымэ лъэпкъхэм щыщхэр Тхьэм ыцІэ ехъоных».
25Сунэт* уашІыгъэу щытыным пкІэ иІ, Тэурат хабзэм итхэр зыбгъэцакІэхэкІэ. Ау Тэурат хабзэм итхэм уатекІымэ, сунэт уашІыгъэу ущыт пэтми, сунэт уамышІыгъэм уфэд. 26Сунэт амышІыгъэ цІыфым Тэурат хабзэм иунашъохэр ыгъэцакІэхэмэ, сунэт амышІыгъэу щыт пэтми, Тхьэм ар сунэт ашІыгъэ цІыфым фэдэу ылъытэнба? 27Ащыгъум зыпкъымкІэ сунэт амышІыгъэ цІыфэу Тэурат хабзэм итхэр зыгъэцакІэрэм о сунэт уашІыгъэр уигъэмысэщт. Сыда пІомэ Тэурат хабзэу тхыгъэр о пІэ илъэу ыкІи сунэт уашІыгъэу ущыт пэтми, Тэурат хабзэм итхэм уатекІы. 28Сыда пІомэ итеплъэкІэ джуртым фэдэу къэлъагъорэр арэп джурт шъыпкъэу щытыр, сунэтэу пкъым къыхэщэу ашІырэри арэп сунэт шъыпкъэу щытыр. 29Ау джурт шъыпкъэу щытыр ыгукІэ джуртэу щытыр ары. Сунэт шъыпкъэу щытыр сунэтэу гум илъыр ары. Ар зыпкъы къикІырэр тхыгъэ горэу арэп, Тхьэм Ыпсэ ЛъапІэ ары нахь. Ащ фэдэ цІыфым ищытхъу цІыфым ыдэжь къикІырэп, Тхьэм ыдэжь къекІы нахь.
2:24 Тхьэм игущыІэ тхыгъэхэм зэрарытым фэдэу – еплъ Пегъымбар Исайас тхылъэу ытхыгъэм 52:5.
2:25 сунэт – «обрезание» ары. Еплъ Пегъымбар Мусэ апэрэ тхылъэу ытхыгъэм 17:9-14.