27

ЯТІОКІЫРЭ БЛЫНЭРЭШЪХЬ

Рим къэлэшхом кІонэу Паул къухьэ горэм зэритІысхьагъэр

Италием къухьэкІэ тэ* тызэрэкІощтыр Іэшъхьэтет Фест зытыреубытэм, Паули нэмыкІрэ хьапсчІэс купи Кайсарым идзэ ыцІэкІэ заджэхэу, нэбгырэ шъих хъурэ дзэлІ купым ипащэхэм ащыщэу, Иулый зыцІэм ыІэ рилъхьагъэх. 2Адрамит къалэм щыщ къухьэу Асие хэ­кум ихыІушъо Іут къалэхэм кІонэу щытыгъэм титІысхьи, ащ тыщежьагъ. Аристарх зыцІэу Македоние хэкум ит Фессалоникэ къалэм щыщыр тигъусагъ.

3ЯтІонэрэ мафэм Сидон къалэм тыІухьагъ. Иулый Паул нэшІукІэ къеплъи, Паул игъусэхэу ащ дэжьым дэсхэм Паул ищыкІагъэхэр ратынхэм пае, ахэмэ адэжь кІонэу фит ышІыгъ. 4Ащ дэжьым тэ тыкъыщежьи, жьыбгъэр къызэрэтпеорэм пае, Кипр хыгъэхъунэм ылъэ­ныкъоу жьыбгъэ къызыщемыпщэрэм тыготэу тыкІуагъ. 5Киликие хэкумрэ Памфилие хэкумрэ афэзанкІэу щыт хым тызэпырыкІи, Ликие хэкум щыщэу Мирэ къалэм тынэсыгъ. 6Ащ дэжьым Александрие къалэм щыщэу, Италием кІонэу къухьэ горэ дзэ пащэм къыщигъоти тыригъэтІысхьагъ. 7Мэфэ заулэрэ макІэ-макІэу тыкІозэ, къинкІэ Книд къалэм фэзанкІэу тынэсыгъ. Жьыбгъэм занкІэу тигъэкІуагъэпти, хым къыхэщэекІыгъэ чІыгу къуапэу Салмонэ зыцІэм тыблэкІызэ, Крит хыгъэхъунэм ылъэныкъоу жьыбгъэр къызыщемыпщэрэм тыготэу ты­кІуагъ. 8Хыгъунэм тыготэу къинкІэ тыкІозэ, Ласей къа­лэм пэгъунэгъоу «КъухьэуцупІэшІухэр» зыфаІорэ чІы­пІэм тынэсыгъ.

9Охътабэ блэкІыгъагъ, къухьэкІи узекІоныр щынагъоу хъугъагъэ, сыда пІомэ нэкІ мафэри* блэкІыгъах. Ары­ти, Паул лІыхэм агуригъаІозэ, 10мырэущтэу ариІуагъ:

–Шъо, лІы купыр, сэ зэрэслъэгъурэмкІэ, тигъогу щы­нагъо хэлъ, хьылъэхэмрэ къухьэмрэ ямызакъоу, тпсэ­хэри тшІокІодынхэу щынагъо щыІ.

27:1 тэ – еплъ 20:5.

27:9 нэкІ мафэр – джуртхэм ямэфэкТ мэфэшхоу «Иом Киппур» зыцІэр ары. Ар зытефэрэр ябгъонэрэ е япшІэнэрэ мазэр арыти, къухьэкІэ кІоныр щынагъоу хъугъэ. А мэфэкІ мэфэшхом джуртхэм анэкІы.

11Ау дзэ пащэр Паул къыІуагъэхэм анахьи, къухьэм итхьаматэми къухьэр зиеми къаІуагъэхэм нахь ядэІу­щтыгъ. 12 КІымафэр ащ дэжьым щыдгъэкІонэу къухьэуцупІэшІоу зэрэщымытыгъэм пае, а чІыпІэм тыкъыщежьэ­жьынышъ, амал иІэмэ, Финик зыцІэ къухьэуцупІэм ты­нэсынышъ, кІымафэр ащ щыдгъэкІонэу нахьыбэр зэгу­рыІуагъэ. Финик зыцІэ къухьэуцупІэр Крит хыгъэхъунэм икъухьэуцупІэхэм ащыщыгъ, къыблэ тыгъэ къохьэпІэ лъэныкъокІи, темыр* тыгъэ къохьэпІэ лъэныкъокІи фэ­гъэзагъэу щытыгъ.

Хым жьыбгъэшхо зэрэщыхъугъэр

13КъыблэмкІэ къикІэу жьыбгъэ тІэкІу къепщэ зэхъум, агу хэлъыр къадэхъугъэу ашІошІи, ежьэхи, Крит хы­гъунэм готхэу кІощтыгъэх. 14Ау бэ темышІэу, «Темыр тыгъэ къыкъокІыпІэмкІэ къикІырэ жьыбгъэшхор» хы­гъэхъунэм къикІи къапеуагъ. 15Жьыбгъэшхом къухьэр ыубытыгъ, къухьэри жьыбгъэшхом пэдгъэуцужьын ты­мылъэкІызэ, ыуж тикІыжьи, жьыбгъэшхом къухьэр ри­фыжьагъ. 16Клаудэ зыцІэ хыгъэхъунэ цІыкІу горэм ылъэныкъоу жьыбгъэ къызыщемыпщэрэм тыготэу ты­кІуи, къинкІэ къухьэм икъуашъо мыкІодэу къэдгъэнэ­жьыгъ. 17Къуашъор къаІэти, къухьэм ыкІоцІ къызыра­гъэхы ужым, кІэпсэшхохэр къухьэм ычІэгъыкІэ чІащыхи, жьыбгъэшхом зэпкъыримыутыным пае, къухьэм къы­ращэкІыгъ. Къухьэр Сыртис зыцІэ чэнджыпІэм къы­тенэнкІэ щынагъэхэти, чэтэнхэр къырагъэхыгъэх, арэу­щтэу жьыбгъэшхом зырагъэфыщтыгъ. 18ЯтІонэрэ мафэ­ми жьыбгъэр щынэгъошхуагъэти, хьылъэхэр хым хадзэу аублагъ. 19Ящэнэрэ мафэм къухьэм иІэмэ-псымэхэм ащыщхэр тэ тІэхэмкІэ хым хэтыдзэхэу тыублагъэ. 20Мэфэ заулэрэ тыгъи жъуагъуи къэмылъагъохэу, жьыбгъэшхор зэпыугъэпти, тымыкІодэу тыкъэнэжьынэу гугъапІэ ти­Іэжьыгъэп.

21ЛІыхэр мышхэхэу бэ зытешІэм, Паул ахэмэ апашъхьэ къиуцуи къыІуагъ:

–Шъо, лІы купыр, сэ шъукъысэдэІоу Крит шъукъы­щемыжьэгъагъэмэ, зэрар зи

27:12 темыр – арапыбзэкІэ «шэмал», тыркубзэкІи «кузей» ары.

шъуиІэщтгъэп, зи жъугъэкІодыщтгъэп. 22Ау джы шъугу шъумыгъэкІоды, къы­шъосэІо, сыда пІомэ шъуащыщэу зи кІодыщтэп. Къу­хьэр ары ныІэп кІодыщтыр. 23Тхьэу зибынхэм сащыщэу, сызфэлажьэрэм имэлэІич нычэпэ къысфэлъагъуи, 24къы­Іуагъ: «Умыщын, Паул! Кайсарым ыпашъхьэ уиуцон фае. Къухьэм исхэу къыбдакІохэрэ пстэури о уихьатыркІэ Тхьэм ынэшІу щыфэныгъэкІэ мыкІодхэу къыгъэнэжьы­щтых». 25Арышъ, шъо, лІы купыр, шъугу шъумыгъэ­кІоды. Тхьэм сэ къызэрэсиІуагъэм фэдэу зэрэхъущтымкІэ ежьым сыщэгугъы. 26Ау жьыбгъэшхом зы хыгъэхъунэ горэм тырифылІэн фае.

27ЯпшІыкІуплІэнэрэ чэщым Адриэхым тыхэтэу жьы­бгъэшхом къухьэр ыфызэ, чэщныкъом дэжь лІыхэм чІыгу горэ гъунэгъу къызэрэхъугъэм гу лъатагъ. 28Хым икуугъэ зашым, ІэплІэкІу тІокІ хъугъэ. ТІэкІу джыри тыкІохи, етІани куугъэр зашым, ІэплІэкІу пшІыкІутф хъугъэ. 29Жьыбгъэшхом къухьэр мыжъошхохэм ашІуигъэнэнкІэ щынагъэхэти, къухьэм ыкІэкІэ гъурзиплІ ра­дзыхыгъэу, нэф къэшъыным гузажъохэу паплъэщтыгъэх. 30Шъэфэу хэхьажьынхэм пае къухьэр зыфыхэрэм ащ ыпэ­кІэ гъурз заулэ радзыхырэм фэдэу зашІи, къуашъор хым ратІупщэхыгъ. 31Джащыгъум Паул дзэ пащэмрэ дзэ­лІхэмрэ ариІуагъ:

–А лІыхэр къухьэм къимынэхэмэ, шъупсэхэр мыкІод­хэу къэжъугъэнэжьынхэ шъулъэкІыщтэп.

32Паул арэущтэу зареІом, дзэлІмэ къуашъом икІэпсэ­шхохэр зэпаупкІыхи, къуашъор рагъэфэхыгъ.

33Нэф зэшъым ыуж, Паул зэкІэри шхэнхэу ялъэІоу, мырэущтэу къыІуагъ:

–Непэ мэфэ пшІыкІуплІ мэхъу, шъо гузэжъогъум шъу­хэтэу зи зышъумышхыгъэр. 34Арышъ, шъушхэнэу лъэ­шэу сышъолъэІу, шъумыкІодэу шъукъэнэжьыным пае, ар шъуищыкІагъ. Шъуащыщэу зыми ышъхьац налъэ кІо­дыщтэп.

35Паул арэущтэу къызеІо ужым, хьалыгъу къышти, зэкІэмэ апашъхьэ Тхьэм щытхъу щыфишІи, хьалыгъур зэгуичи, ышхэу ыублагъ. 36ЗэкІэми гу къызыІэпашІыхьа­жьи, ахэри шхагъэх. 37Тэ къухьэм ис пстэури нэбгырэ шъитІурэ тІокІищырэ пшІыкІухырэ тыхъущтыгъ.

38Ахэмэ зызагъэшхэкІыжьым, коц хьылъэхэр хым хадзэхэзэ, къухьэр нахь псынкІэ ашІыгъ.

Къухьэр зэрэзэхэкъутагъэр

39Нэф къызэшъым, хыІушъор ашІэжьыгъэп, ау пша­хъо Іулъэу зы хытІуалэ* горэ алъэгъугъ. Амал иIэмэ, ащ къухьэр рафылІэнэу тыраубытагъ. 40Гъурзэхэм якІэпсэшхохэр зэпаупкІыхи, хым къыхагъэнагъэх. Ардэ­дэм къухьэр зыгъэІорышІэрэ хьанцэхэм якІэпсэшхохэри атІэтагъэх. ЕтІанэ чэтэн цІыкІур жьыбгъэм щагъаІи, хыІушъом фаузэнкІыгъ. 41Ау къухьэр пшэхъолъэ чІыпІэ горэм хахьи, пшахъом къытенагъ. Къухьэм ыпэкІэ мы­хъыешъоу чэнджыпІэм тенагъ, хыор лъэшхэми къу­хьэм ыкІэ зэпкъыраутэу аублагъ.

42ХьапсчІэсхэм ащыщэу зыгорэ есызэ хэмыхьажьыным пае, дзэлІхэм ахэр аукІынхэ агу хэлъыгъ. 43Дзэ пащэм Паул мыкІодэу къыгъэнэжьынэу фэягъэти, дзэлІхэм ягу­хэлъ аримыгъашІэу, есыкІэ зышІэхэрэм апэ псым зы­хадзэнышъ, хыІушъом Іусыхьанхэу унашъо афишІыгъ. 44Къэнагъэхэри пхъэмбгъухэмрэ къухьэм щыщ къутафэ­хэмрэ ателъхэу хыІушъом зынагъэсынэу ариІуагъ. Арэу­щтэу зэкІэри хыІушъом нэсхи, псаухэу къэнэжьыгъэх.