АПОСТОЛ ЯКЪУБЭ ТХЫЛЪЭУ ЫТХЫГЪЭР
АПЭРЭШЪХЬ
ШІуфэс ехыныр
Сэ сы Якъубэ, Тхьэмрэ Зиусхьанэу Исус Христосрэ сафэлажьэ. Шъо дунаем итэкъухьагъэхэу щыпсэурэ унэгъо лъэпкъ пшІыкІутІум шІуфэс шъосэхыжьы.
ШІошъхъуныгъэмрэ зэхэшІыкІыныгъэмрэ
2Сшыхэр, шъуишІошъхъуныгъэ ишъыпкъагъэ зыгъэунэфырэ къин зэфэшъхьафхэм шъуахафэмэ, шъугушІу, 3сыда пІомэ мы къинхэм шъуишІошъхъуныгъэ ишъыпкъагъэ загъэунэфы ужым, а къинхэм теубытэныгъэ къарыкІэу зэрэщытыр шъошІэ. 4Теубытэныгъэми иІоф рерэгъэкъу, лъэныкъо пстэумкІи зишъыпкъагъэ щыкІагъэ зимыІэ цІыф икъугъэхэу шъухъуным пае. 5Ау шъуащыщэу зыгорэм изэхэшІыкІыныгъэ щыкІагъэ иІэмэ, Тхьэм ерэлъэІу, ащи зэхэшІыкІыныгъэ къыритыщт. Сыда пІомэ зыми емыгыеу, игуапэу Тхьэм зэкІэми аретышъ ары. 6Ау
емыхъырэхъышэу, шІошъхъуныгъэкІэ ерэлъэІу, сыда пІомэ Тхьэм ехъырэхъышэрэр хыорэу жьыбгъэм адыкІи мыдыкІи ыфызэ, зэридзэрэм фэд. 7Тхьэм зыгорэ къыритынкІэ ащ фэдэ цІыфыр орэмыгугъэ. 8Ар темыубытагъэу, акъыл тІуанэ зиІэ цІыф, ышІэрэ пстэумкІи теубытэныгъэ иІэп.
ТхьамыкІагъомрэ баиныгъэмрэ
9Къош тхьамыкІэр Тхьэм ар зэриІэтыгъэмкІэ орэгушІо. 10Ау баир Тхьэм ар зэригъэцІыкІугъэмкІи орэгушІо, сыда пІомэ уцым икъэгъагъэ фэдэу кІодыжьыщт. 11Тыгъэр къыкъокІы, къыдэкІуае, фэбэ дэдэ мэхъу. Фэбагъэми уцыр егъэгъу. Уцым икъэгъагъэ къыпэтэкъушъ, идэхагъэ мэкІодыжьы. Джащ фэдэу лІы баир иІофхэм апылъызэ кІодыжьыщт.
Къинхэу цІыфхэм яшъыпкъагъэ зыгъэунэфыхэрэмрэ Іофхэу цІыфхэм псэкІод ашІэнэу дэзыхьыххэрэмрэ
12ЦІыфэу зишъыпкъагъэ гъэунэфыгъэу хъу зыхъукІэ, теубытэныгъэ зиІэр сыхьатмафэ ежьагъ, сыда пІомэ ишъыпкъагъэ гъэунэфыгъэу зыхъурэ ужым, мыкІодыжьын щыІэныгъэ танджэу ежьыр шІу зылъэгъухэрэр къызэригъэгугъагъэхэр Тхьэм а цІыфым къыритыщт.
13ЦІыф горэ ишъыпкъагъэ зыгъэунэфырэ къиным хафэмэ, «Тхьэр ары сызыгъэунэфэу сыдэзыхьыхрэр», ерэмыІу. Бзэджагъэм Тхьэр зыІэпищэшъущтэп. Тхьэми зыми бзэджагъэ ышІэнэу дихьыхыщтэп. 14Хэти ежь ихъопсэныгъэ Іаехэр ары зыІэпызыщэхэу ыкІи зыдэзыІыгъхэу дэзыхьыххэрэр. 15Хъопсэныгъэ Іаер лъэрмыхьэ хъумэ, псэкІодшІэныр къелъфы; псэкІодшІэнри икъугъэу хъу зыхъукІэ, лІэныгъэр къелъфы.
16Сшы лъапІэхэр, зыми зешъумыгъэгъапцІ. 17Сыдрэ тын дэгъури тын шъыпкъэри уашъом ыдэжь къекІы, уашъом щыІэ нэфынэхэм Ятэ лъапІэ ыдэжь къекІы. ЗызэзыхъокІырэ жьаухэм афэдэу ащ зызэблихъужьырэп. 18Ежь фэягъэти шъыпкъагъэм игущыІэхэмкІэ ибынэу тигъэхъугъ, ежьым къыгъэхъугъэ пстэуми ащыщхэу апэрэу тыхъуным пае.
Тхьэм игущыІэхэм уядэІунымрэ бгъэцэкІэнхэмрэ
19Сшы лъапІэхэр, мыр зэжъугъашІэ. Хэти дэІонымкІэ псынкІэу орэхьазыр, ау шІэхэу орэмыгущыІэ, псынкІэуи орэмыгубж. 20Сыда пІомэ цІыфым игубжыныгъэ Тхьэм ыдэжькІэ шъыпкъагъэр ыгъэцакІэрэп. 21Арышъ, къышъуханэрэ гу шІоигъэ пстэури бзэджагъэ пстэури хэшъунэжьых. Тхьэм шъугухэм къарилъхьэгъэ гущыІэхэу шъупсэхэр мыкІодхэу къэзыгъэнэжьын зылъэкІыщтхэр гушъэбагъэкІэ шъуубытых.
22Тхьэм игущыІэхэм шъуядэІу къодыекІэ хъущтэп, жъугъэцэкІэнхэ фае. Армырмэ зышъогъэпцІэжьы. 23Сыда пІомэ а гущыІэхэм ядэІоу зымыгъэцакІэрэр зынапэу гъунджэм къищырэм еплъырэ цІыфым фэд. 24Ар зэплъыжьышъ, ІокІыжьы, итеплъи зыфэдагъэр щэгъупшэжьы. 25Ау цІыфэу ышІэрэ пстэумкІэ сыхьатмафэ ежьагъэр мыры: Тхьэм иунашъохэу щыкІагъэ зимыІэхэу ыкІи икъугъэхэу, цІыфхэм шъхьафитныгъэ яІэ зыгъэхъухэрэм дэгъоу ахэплъэрэ зэпытэу, Іофхэу зэдэІугъэхэри щымыгъупшэжьэу зыгъэцакІэрэр ары.
26Тхьэм ищынагъо ыгу зэрилъыр зыгорэ шІошІэу, ау ыбзэгу ымыубытмэ ащ зыкъегъэпцІэжьы, идини пкІэ иІэп. 27Ау Тхьэу Ты лъапІэм ыдэжькІэ Тхьэм ищынагъо къабзэу, щыкІагъэ зимыІэр мыр ары: гузэжъогъум хэтхэу ибэхэмрэ шъузабэхэмрэ уакІэлъыплъэнри, лажьэ уимыІэу мы дунаем ибзэджагъэ зыщыбдзыенри ары.