ЯЩЭНЭРЭШЪХЬ
Бзэгур уубытыныр
Сшыхэр, шъуащыщэу бэ гъэсакІоу орэмыхъу, сыда пІомэ Тхьэм тэ гъэсакІохэм хьыкумэу къыттришІыхьащтыр нахь хьыкумышхоу зэрэхъущтыр шъошІэ. 2Тэ зэкІэми Іаджыри псэкІод тэшІэ. ЦІыф горэм игущыІэхэмкІэ псэкІод ымышІэмэ, зишъыпкъагъэ щыкІагъэ зимыІэ цІыф икъугъэу щыт, ыпкъ зэкІэ ыгъэІорышІэн елъэкІы.
3Шыхэм шхоІур ажэмэ адэтэлъхьэ, дгъэІорышІэнхэм пае. АщкІэ зэкІэ апкъ зетэщэ. 4Къухьэхэми шъуяплъ. Ахэр иных, жьыбгъэшхохэми афых. Ау щытми, къухьэр зезыфэрэм къухьэм ыкІэ пыт хьанцэ цІыкІумкІэ зыдыфаем егъазэ. 5Ащ фэдэу бзэгури пкъым щыщэу зы пкъыгъо цІыкІу, ау бэ егъахъэ. Шъуеплъ, мэшІо цІыкІум мэзышхор зэрэзэкІигъанэрэм. 6Бзэгури зыгъэкІодырэ машІом фэд. Мы дунаем ибзэджагъэ ащ тиз. Тэ тпкъы щыщхэм ащыщэу бзэгур ары пкъыр зэкІэ мыкъабзэу зышІырэр, щыІэныгъэм ищэрэхъи* машІо хэзыгъанэрэр. Джэхьнэмым имашІу ары ежь бзэгум машІо къыкІэзыдзагъэр.
7Сыдрэ хьакІэ-къуакІи, бзыуи, ныбэкІэ цуахъорэ псэушъхьи, псым хэс псэушъхьи цІыфхэмэ агъэІасэх ыкІи агъэІэсагъэх, 8ау бзэгур зыми ыгъэІэсэн ылъэкІырэп. Ар къэбгъэуцун умылъэкІэу бзаджэ гор, лІэныгъэ къызхэкІырэ щынаутри хиз.
9БзэгумкІэ Тхьэу Ты лъапІэм щытхъу фэтэшІы, бзэгумкІи ежь фэдэнхэу Тхьэм къыгъэхъугъэ цІыфхэм тяхъоны. 10А жэ дэдэм щытхъури хъонэныри къыдэкІых. Арэущтэу щытмэ хъущтэп, сшыхэр. 11А зы псынэ дэдэм псы ІэшІури псы дыджыри къикІын ылъэкІына? 12Сшыхэр, ынджыр
3:6 щыІэныгъэм ищэрэхъ – зы цІыф горэм ищыІэныгъэ зэкІэ ары.
чъыгым* зейтун* къыпыкІэн ылъэкІына? Е сэнэшъхьэ къулэм ынджыр къыпыкІэн ылъэкІына? Джащ фэдэу псынэ щыугъэм псы ІэшІу къикІын ылъэкІыщтэп.
ЗэхэшІыкІыныгъэу уашъом къикІырэр
13Шъо шъуащыщэу хэта зэхэшІыкІыныгъи гулъытэныгъи зиІэр? Ащ изекІокІэ дэгъукІэ гушъэбагъэу зэхэшІыкІыныгъэм къикІырэр иІэу, ишІушІагъэхэр къерэгъэлъагъох. 14Ау шъугъоныгъэ дыджымрэ зэщыхьаныгъэмрэ шъугухэм арылъхэмэ, шъузыщымытхъужь, шъыпкъагъэри шъумыгъэпцІы. 15Ащ фэдэ зэхэшІыкІыныгъэр уашъом къикІырэп, ар мы дунаем щыщ нахь. Тхьэм Ыпсэ ЛъапІи хэлъэп, джынапцІэхэр хэлъхэ нахь. 16Сыда пІомэ шъугъоныгъэрэ зэщыхьаныгъэрэ зыдэщыІэм, Іофхэр зэІыхьагъэхэу щэхъух, сыдрэ дэигъэри щыІэ мэхъу.
17Ау уашъом къикІырэ зэхэшІыкІыныгъэр ыпэ рапшІэу къабзэ, етІанэ зэшІужьыныгъэ хэлъ, гушъабэ, ІорышІэ, гукІэгъу хэлъ зэпыт, шІу ешІэ зэпыт, зафэ, тхьагъэпцІыгъэри хэлъэп. 18ЗэшІужьыныгъэ зышІэхэрэр ары шъыпкъагъэр къызхэкІырэ чылапхъэр гупсэфыныгъэкІэ цІыфхэм агухэм арызылъхьэхэрэр.