11

ЯПШІЫКІУТЮНЭРЭШЪХЬ

ЛъэкІыныгъэхэу Тхьэм Ыпсэ ЛъапІэ цІыфхэм къаритхэрэр

Сшыхэр, Тхьэм Ыпсэ ЛъапІэ цІыфхэм лъэкІыныгъэ­хэу къаритхэрэр зыфэдэхэр шъумышІэу шъукъэзгъэнэнэу сыфаеп. 2Христос шъумышІэу шъузыщэтым, тхьэ нэпцІ бзакохэм шъукъыращэкІэу зэрэщытыгъэм фэдэу, ахэмэ адэжь шъузэрэкІощтыгъэр шъошІэ. 3Арышъ, мыр къы­жъугурызгъэІонэу сыфай: Тхьэм Ыпсэ ЛъапІэ илъэ­кІыныгъэкІэ къэгущыІэу, хэти Исус ебгын ылъэкІыщтэп, Тхьэм Ыпсэ ЛъапІэ илъэкІыныгъэкІи мыхъоу, «Исусыр ары Зиусхьаныр», ыІошъущтэп.

4Тхьэм Ыпсэ ЛъапІэ цІыфхэм лъэкІыныгъэхэу къа­ритхэрэр зэфэшъхьафых, ау Тхьэм Ыпсэ ЛъапІэ зы. 5Іофхэу цІыфхэм Зиусхьаным фашІэхэрэр зэфэшъхьа­фых, ау а цІыф пстэури зы Зиусхьан дэдэм фэлажьэх. 6Тхьэм цІыфхэм Іоф ашІэнэу лъэкІыныгъэ зэраритырэр

зэфэмыдэу щыт, ау а Іофхэр зэкІэ цІыф пстэуми ашІэнхэу лъэкІыныгъэ язытырэ Тхьэр зы.

7Тхьэм Ыпсэ ЛъапІэ хэти зэфэмыдэу зыкъырегъэ­лъагъу, шІошъхъуныгъэ зиІэ пстэуми ишІуагъэ аригъэ­кІыным пае. 8Тхьэм ежь Ыпсэ ЛъапІэ къыбгъодэкІэу, зэхэшІыкІыныгъэ зиІэ гущыІэхэр къыІонхэу зы цІыф горэм лъэкІыныгъэ къыреты, нэмыкІ цІыфми Тхьэм ежь Ыпсэ ЛъапІэ тетэу, шІэныгъэ зиІэ гущыІэхэр къыІон­хэу лъэкІыныгъэ къыреты. 9НэмыкІ цІыфми а Псэ ЛъэпІэ дэдэм къыбгъодэкІэу, шІошъхъуныгъэ иІэнэу лъэкІыныгъэ къыреты; нэмыкІ цІыфми а Псэ ЛъэпІэ дэдэм къыбгъодэкІэу, сымаджэхэр ыгъэхъужьынхэу лъэ­кІыныгъэхэр къыретых. 10НэмыкІ цІыфми Іофышхо гъэ­шІэгъонхэр ышІэнхэу лъэкІыныгъэ къыреты; нэмыкІ цІыфым ыгу Тхьэм ежь игущыІэхэр къырилъхьэхэу, ахэр къыІонхэу лъэкІыныгъэ къыреты; нэмыкІ цІыфми Іоф горэ Тхьэм Ыпсэ ЛъапІэ ыдэжь къикІымэ, къи­мыкІымэ, зэхишІыкІынэу лъэкІыныгъэ къыреты; етІанэ нэмыкІ цІыфми ымышІэрэ бзэхэмкІэ къэгущыІэнэу лъэкІыныгъэ къыреты; нэмыкІ цІыфми а бзэхэр зэридз­экІынхэу лъэкІыныгъэ къыреты. 11А Псэ ЛъэпІэ дэдэр ары цІыфхэм ахэр ашІэнхэу лъэкІыныгъэхэр къязыты­рэр. Хэти шъхьафэу, Тхьэм Ыпсэ ЛъапІэ зэрэфаем тетэу реты.

Пкъыр зы, пкъым щыщхэр бэ

12Пкъым щыщхэр бэ хъухэми, пкъыр зы. Пкъым щыщ пстэури бэ хъухэми, а зы пкъым щыщых. Христос иІоф арэущтэу щыт. 13Сыда пІомэ тэ тыджуртми, тыурымми, тыпщылІми, тышъхьафитми, тэ зэкІэ а зы Псэ ЛъапІэр тыгухэм арылъынэу тызаумэхъым, Христос ыпкъ щыщ тыхъугъ, Христосми а зы Псэ ЛъапІэм тэ пстэуми тиІахьэ хэлъэу ыгъэхъугъ.

14Сыда пІомэ пкъым щыщхэр зэп, бэ мэхъух нахь, 15Лъакъом «Іэу сызэрэщымытым пае, пкъым сыщыщэп», ыІомэ, ащ пае пкъым щымыщэу мэхъуа? 16ТхьакІумэми «Нэу сызэрэщымытым пае, пкъым сыщыщэп», ыІомэ, ащ пае пкъым щымыщэу мэхъуа? 17Пкъыр зэкІэ нэу щытыгъэмэ, зэхэхыныгъэм иІоф сыдэущтэу хъущтыгъ? Ащ фэдэуи пкъыр зэкІэ тхьакІумэу щытыгъэмэ, пэмэ­ныгъэм иІоф сыдэущтэу хъущтыгъ?

18Ау Тхьэм пкъым щыщ пстэури зэхилъхьагъ, сыд фэди ежьыр зэрэфаем тетэу. 19Пкъым щыщхэр зэкІэ зы закъоу щытыгъэмэ, пкъыр тыдэ къэнэщтыгъа? 20Ау джы зэрэщытымкІэ пкъым щыщхэр бэ мэхъух, ау пкъыр зызакъо.

21Нэм «Сэ усищыкІагъэп», ыІоу, Іэм риІошъущтэп. Шъхьэми «Сэ шъусищыкІагъэп», ыІоу, лъакъохэм ари­Іошъущтэп. 22Ау пкъым щыщхэу адрэмэ анахьи нахь кІуачІэ зимыІэхэу къэлъагъохэрэр нахь тищыкІагъэх. 23Пкъым щыщхэу лъытэныгъэ зифэмышъуашэу тлъы­тэхэрэми нахь тафысакъы. 24Пкъым щыщхэу тызтеукІы­тэхьэхэрэри нахь екІоу тэгъэбылъых. Пкъым щыщхэу тызтемыукІытыхьэхэрэм ар ящыкІагъэп. Ау пкъым щыщхэу лъытэныгъэ зимыІэхэм адрэ щыщхэм анахьи нахь лъытэныгъэ аритэу, Тхьэм пкъыр зэхилъхьагъ. 25Тхьэм арэущтэу зыфишІагъэр тэ ежь ыпкъ щыщхэр тызэпэмыуцоу, тызэфэдэу тызэфэсакъыжьыныр ары. 26Арышъ, пкъым щыщэу зыгорэм къин ыщэчмэ, а пкъым щыщ пстэуми дащэчы. Ащ фэдэу, пкъым щыщэу зыгорэм лъытэныгъэ ыгъотымэ, а пкъым щыщ пстэури дэгушІох.

27Шъо Христос шъурипкъ, шъуащыщэу хэти а пкъым шъущыщ. 28Чылыс зэІукІэм фэлэжьэнхэу Тхьэм апэ­рэмкІэ цІыф заулэ апостолхэу къыгъэнэфагъэх. ЯтІо­нэрэмкІи, цІыф заулэ пегъымбархэу къыгъэнэфагъэх. ЯщэнэрэмкІи, цІыф заулэмэ адрэ цІыфхэм Іофхэр ара­гъэшІэнхэу къыгъэнэфагъэх. ЕтІанэ Іофышхо гъэшІэ­гъонхэр ашІэнхэу цІыф заули къыгъэнэфагъэх. ЕтІанэ сымаджэхэр агъэхъужьынхэм пае, лъэкІыныгъэхэр яІэн­хэу цІыф заули къыгъэнэфагъэх. НэмыкІхэри адрэ цІыф­хэм ІэпыІэгъу афэхъунхэу, нэмыкІхэри пэрытынхэу, етІа­нэ нэмыкІхэми ежьхэм амышІэрэ бзэхэмкІэ къэгущыІэн­хэу къыгъэнэфагъэх. 29ЦІыф пстэури апостолхэу щытхэп, арыба? ЦІыф пстэури пегъымбархэу щытхэп, арыба? ЦІыф пстэуми адрэ цІыфхэм Іофхэр арагъашІэхэрэп, арыба? ЦІыф пстэуми Іофышхо гъэшІэгъонхэр ашІэ­хэрэп, арыба? 30ЦІыф пстэуми сымаджэхэр агъэхъужьын­хэу лъэкІыныгъэхэр яІэхэп, арыба? АмышІэрэ бзэхэмкІи цІыф пстэури къэгущыІэхэрэп, арыба? ЦІыф пстэуми ащ фэдэ бзэхэр зэрадзэкІыхэрэп, арыба?

31Ау лъэкІыныгъэхэу анахь инхэм ауж шъуит. Джы гъогоу анахьышІур шъозгъэлъэгъущт.