Des1Des2Des3Des4Des5Des6

05

ЯТФЭНЭРЭШЪХЬ

Тхьэм шІу ылъэгъурэ бынхэу шъузэрэщытым пае, ежьым илъэужхэм шъуарыкІу. 2Христос шІу тилъэгъуи, мэ ІэшІу зыпихырэ тынэуи Тхьэм ыгу зэІурэ къурмэны­пхъэуи тэщ пае ыпсэ зэритыгъэм фэдэу, шІулъэгъуныгъэ шъугухэм арылъэу шъузекІу.

3Ау Тхьэм ицІыф лъапІэхэм зэряфэшъуашэм фэдэу, зинэ шІэным, е сыд щыщырэ гумыкъэбзагъэм, е нэй­псыягъэм ягугъу шъуадэжь щышъушІы хъущтэп. 4Емы­кІу гущыІэныр, делагъэ гущыІэныр, мыхъун сэмэр­къэуныр шъо къышъуфэшъуашэп, Тхьэм ищытхъу шъу­шІын фае нахь. 5Сыда пІомэ мы Іофыр зэжъугъашІэ: Зинэ зышІэрэ цІыфым, е зыгу мыкъабзэ цІыфым, е нэйпсые цІыфым – ащ фэдэ цІыфым тхьэ нэпцІыр ыгъэ­лъапІэу мэхъу- Христосрэ Тхьэрэ я ТетыгъошхокІэ Іахьэ къылъысыщтэп. 6ГущыІэ мыщыухэкІэ зыми зы­къешъумыгъэгъапцІ, сыда пІомэ ащ фэдэ Іофхэм апае Тхьэм емыдэІухэрэм игубж къалъигъэсыщт. 7Арышъ, ащ фэдэ цІыфхэм гъусэ шъуафэмыхъу.

8Сыда пІомэ зэгорэм шІункІыгъэм шъуфэдэу шъущы­тыгъагъ, ау джы Зиусхьаныр шъугухэм зэрарылъым пае, нэфынэу шъухъугъ. Нэфынэм ибынхэр зекІонхэ зэрэ­фаем фэдэу шъузекІу, 9сыда пІомэ нэфынэм шІугъэу къыхэкІырэр шІугъэ пстэури, зэфэныгъэ пстэури, шъы­пкъэгъэ пстэури ары. 10Зиусхьаным Іофхэу игъоу ылъы­тэхэрэр жъугъэунэфых ыкІи зэжъугъашІэх. 11ПкІэ зи­мыІэ шІункІыгъэ Іофхэм шъуиІоф ахэшъумылъхь, ау а Іофхэр зыфэдэхэр жъугъэнафэх. 12Сыда пІомэ ащ фэдэ цІыфхэм Іофхэу шъэфэу ашІэхэрэм ягугъу пшІынри емыкІу. 13Ау нэфынэм Іофхэр зэкІэ къызигъэнафэхэкІэ, ахэр къэлъагъох, сыда пІомэ къэлъагъорэ пстэури нэ­фынэу мэхъу. 14Джары мырэущтэу зыкІаІорэр:

«О, чъыерэр, къэущыжь, лІагъэхэм къахэтэджыкІыжьи, Христос нэфынэр къыптригъэпсэщт».

15Арышъ, шъузэрэзекІорэм инэу шъуфэсакъ, зэхэшІы­кІыныгъэ зимыІэхэм шъуафэмыдэу, зэхэшІыкІыныгъэ зиІэхэм шъуафэдэу шъузекІу. 16Игъор блэшъумыгъэкІ, сыда пІомэ мы мафэхэр бзаджэхэшъ ары. 17Арышъ, шъу­мыгупшысэу шъумызекІу, Зиусхьаныр зыфаери зыгуры­жъугъаІу. 18СэнэпсымкІэ зышъумыгъэуташъу. Ащ къы­хэкІырэр мыхъомышІэ псэукІэр ары. Тхьэм Ыпсэ ЛъапІи икъугъэу шъугухэм арыжъугъэлъ. 19ОрэдхэмкІи, тхьэ­щытху орэдхэмкІи, Тхьэм Ыпсэ ЛъапІэ шъугухэм къа­рилъхьэрэ орэдхэмкІи шъузэдэгущыІ. Шъугу етыгъэу Зиусхьаным щытхъу фэшъушІэу, ежьым пае орэд къа­шъуІо. 20Ти Зиусхьанэу Исус Христос ыцІэкІэ Іоф пстэуми апае Тхьэу Ты лъапІэм щытхъу фэшъушІ зэпыт.

21Христос ищынагъо шъугухэм арылъэу, шъузэфэІо­рышІ.

Шъузымрэ лІымрэ зэрэзэфыщытынхэ фаер

22Шъо, шъузхэр, Зиусхьаным шъузэрэфэІорышІэрэм фэдэу, шъуилІыхэми шъуафэІорышІ. 23Сыда пІомэ Христос чылыс зэІукІэм ышъхьэу зэрэщытым фэдэу, лІыри ишъуз ышъхьэу щыт. Чылыс зэІукІэр Христос ыпкъэу щыт, ежьыри ары а пкъыр мыкІодэу къэзыгъэнэжьырэр. 24Чы­лыс зэІукІэр Христос зэрэфэІорышІэрэм фэдэу, шъузыри сыд щыщымкІи илІ фэІорышІэн фае.

25Христос чылыс зэІукІэр шІу ылъэгъоу, ыпсэ ащ зэрэфитыгъэм фэдэу, хэтрэ лІи ишъуз шІу ерэлъэгъу. 26Христос ыпсэ зыфитыгъэр псыкІи* игущыІэхэмкІи чылыс зэІукІэм щыщхэр ыгъэкъабзэхэу, ахэмэ гукъэ­бзагъэ яІэ хъунэу ары. 27Ащ нэмыкІэу, Христос ыпсэ зыфитыгъэр чылыс зэІукІэм идэхагъэкІэ, бжьыгъэ, е зэлъагъэ, е ащ фэдэ щыкІагъэ зи имыІэу, гукъэбзагъэ иІэу, лажьэ зи имыІэу, ежь ыпашъхьэ ригъэуцонэу ары.

28Ащ фэдэу лІым ыпкъы унае фэдэу ишъуз шІу ылъэгъун фае. Зишъуз шІу зылъэгъурэм ышъхьэ шІу елъэгъужьы.

29Зыми ежьым ыпкъ зыкІи ыуджэгъужьыгъэп, ау пкъым ищыкІагъэр регъэгъоты ыкІи егугъу, Зиусхьаныр чылыс

5:26 псыкІэ – умэхъыныр (еплъ Маттэ 3:1) ары зыфиІорэр.

зэІукІэм зэрегугъурэм фэдэу; 30сыда пІомэ Христос ыпкъ тыщыщ, ыл тыщыщ, икъупшъхьэхэми тащыщ. 31Тхьэм игущыІэ тхыгъэхэм зэрарытым фэдэу,* «Ащ къыхэкІыкІэ лІыр ятэ-янэхэм ахэкІынышъ, ишъуз гъусэ фэхъунышъ, а тІури зыпкъ хъущтых». 32А гущыІэхэм шъэфэу ахэлъыр шъэфышху: Сэ къызэрэзгурыІорэмкІэ, а гущы­Іэхэр зэхьылІагъэхэр Христосрэ чылыс зэІукІэмрэ ары. 33Арэущтэу шъуащыщ пэпчъ ежь ышъхьэ шІу зэрилъэгъурэм фэдэу, ишъузи шІу ерэлъэгъу. Шъузыми илІ лъытэныгъэ ферэшІ.